Ил Дархан Айсен Николаев быйылгы Ил Түмэҥҥэ туһаайыытыгар кэлэр 2025 сылы Ийэ дойдуну көмүскээччи сылынан биллэрдэ. Бу быһаарыыны кини Ийэ дойдуну көмүскүүр санааны тула көлүөнэлэри утумнуур сыаллаах ылыммытын быһаарда.
«Саха сиригэр билигин тоҕус Аҕа дойду сэриитин кыттыылааҕа баар. Бу саалаҕа анал байыаннай дьайыы кыттыылаахтара – Арассыыйа Дьоруойдара, хорсун быһыыны көрдөрбүт байыастар уонна эдэр кадеттар олороллор. Кинилэр көлүөнэлэр ситимнэрин кэрэһэлииллэр. Бу ситим өссө күүһүрэн, дойдуга бэриниилээх буолуу суолтата өссө улаатарын туһугар кэлэр сылы Ийэ дойдуну көмүскээччи сылынан биллэрэбин», – диэн Айсен Николаев эттэ.
Маны сэргэ, Айсен Сергеевич Улуу Кыайыы 80 сылынан сэрии бэтэрээннэригэр биир кэмнээх төлөбүр икки төгүл үрдээн 2 мөл. солк. буоларын уонна Аҕа дойду сэриитигэр сыһыаннаах атын категорияларга эмиэ биир кэмнээх төлөбүр оҥоһуллуохтааҕын иһитиннэрдэ.
Ураты болҕомтону Ил Дархан анал байыаннай дьайыы кыттыылаахтарын өйөбүлүгэр уурда. Кини байыастарбыт кыайыылаах кэлэллэригэр былаас уорганнара уонна уопсастыба бэлэм буолуохтааҕын тоһоҕолоото. Ол курдук, байыастары эйэлээх олоххо үөрэтии, үлэнэн хааччыйыы инники күөҥҥэ туруохтаах.
Сонун төрдө: СӨ Бырабыыталыстыбатын уонна Ил Дарханын пресс-сулууспата
