Дьокуускайга Сүрэх-тымыр киинэ тутуллан киириэҕиттэн, 2022 сылтан, Саха сиригэр сүрэх-тымыр ыарыытыттан өлүү 7%-нан аҕыйаабыт. Ити кэм иһигэр кииҥҥэ барыта 13 тыһыынча кэриҥэ киһи көрдөрүммүт. Ол туһунан Айсен Николаев Ил Түмэҥҥэ Анал туһаайыытыгар эппитэ.
“Сыыйа-баайа Саха сирин олохтоохторо өрөспүүбүлүкэттэн ханна да ырааппакка үрдүк таһымнаах мэдиссиинэ өҥөтүнэн туһанар буолалларын ситиһэн эрэбит. Ол курдук, 2022 с. киин үлэҕэ киириэҕиттэн, барыта 13 тыһыынча кэриҥэ киһи көрдөрдө. Сүрэҕи оҥорор хирурдарбыт Уһук Илиҥҥэ ураты эпэрээссийэлэри оҥороллор. Аҥаардас 2024 сыл иһигэр 1650 киһини эпэрээссийэлээтилэр, онтон 100-тэн тахсатын – аһаҕас сүрэххэ. Ол үтүө түмүгэ номнуо көстөр буолла: 2022 сылтан өрөспүүбүлүкэбитигэр сүрэх уонна тымыр ыарыытыттан өлөр дьон ахсаана 7%-нан аҕыйаата. Ити иһиттэххэ эрэ хоччорхой, кураанах сыыппара курдук эрэри, ол барыта туохха да тэҥнэммэт дьон олоҕун туоһулуур”, – диэн Айсен Николаев быһаарда.
Кини этэринэн, балыыһа тутуллара элбээн иһэр. Ол курдук, 2024 с. саҥа былыыһалар Муомаҕа, Чурапчыга уонна Уус Майдаҕа арыллыбыттар. Майаҕа, Сангаарга, Намҥа, Ньурбаҕа, Бүлүүгэ уонна Үөһээ Бүлүүгэ балыыһа комплекстара тутулла тураллар. Аммаҕа поликлиника тутуута түмүктэнэн эрэр.
“Дьон-сэргэ да махтанара элбээтэ. 2024 с. мэдиссиинэ көмөтүттэн астыммыт дьон ахсаана 2023 сылы кытта тэҥнээтэххэ, 12%-нан улаатта", – диэн Ил Дархан чахчылары сырдатта.
