Сыл аайы Кыайыы күнүн көрсө Аҕа дойду Улуу сэриитин бэтэрээннэригэр бэриллэр биир кэмнээх төлөбүр суумута 2 мөл. солк. тиийэ улаатыаҕа. Күн бүгүн Саха сиригэр 9 тыыннаах бэтэрээн баар. Көмө харчыны сэрии кыттыылаахтарын огдооболоро, төгүрүктээһиҥҥэ олорбут Ленинград олохтоохторо, конц-лааҕырдар муҥнаахтара, тыыл бэтэрээннэрэ уонна сэрии сылын оҕолоро эмиэ ылыахтара. Ол туһунан Ил Дархан иһитиннэрэр.
“Улуу Кыайыы үбүлүөйдээх сылын көрсө бары бэтэрээннэргэ, 13 тыһыынча Саха сирин олохтооҕор, өрөспүүбүлүкэ аатыттан харчы төлөбүрэ оҥоһуллуо. Күн бүгүн Саха сиригэр Аҕа дойду сэриитин тоҕус бэтэрээнэ олорор. Кинилэргэ көрүллэр төлөбүр 2 мөл. солк. тиийиэҕэ. Көмө харчыны сэрии кыттыылаахтарын огдооболоро, төгүрүктээһиҥҥэ олорбут Ленинград олохтоохторо, конц-лааҕырдар муҥнаахтара, тыыл бэтэрээннэрэ уонна сэрии сылын оҕолоро эмиэ ылыахтара. Ол да буоллар ити – аныгы көлүөнэ дьон кинилэргэ саамай кыра махталбыт. Кинилэр аан дойду туһугар оҥорбут үтүө дьайыылара, хорсун быһыылара тугунан да кэмнэммэт.
2025 сыл – Улуу Кыайыы 80 сыла – биһиги өрөспүүбүлүкэбитигэр, Арассыыйаҕа уонна хас биирдиибитигэр ураты суолталаах сыл. Улуу Кыайыы сэбиэскэй норуот килбиэннээх уонна хорсун быһыытынан, аан дойдуну фашизмтан быыһаабыт мөлүйүөнүнэн дьон олоҕунан албан аатырыа. Доҕоттор, биһиги Аҕа дойду Улуу сэриитин буойуннарын – аҕаларбытын уонна эһэлэрбитин – кытта кэккэлэһэ олорор дьолломут тиһэх көлүөнэбит.
Кэлиҥҥи көрдүүр-ирдиир үлэлэр түмүктэринэн, Смоленскай, Псков уонна Колуга уобаластарын сиригэр дьоруойдуу охтубут 2200-тэн тахса Саха сирин салааттын аата сөргүтүлүннэ. Анал бырайыак чэрчитинэн, ити уобаластарга биһиги саллааттарбыт ааттарын үйэтитэр мэҥэ таастар туруохтара. Мамай булгунньаҕар (Мамаев курган) Саха сириттэн төрүттээх Сталинград кыргыһыытын буойуттарыгар аналлаах бэлиэ туруоҕа”, – диэн Айсен Николаев тоһоҕолоон бэлиэтээтэ.
Санаттахха, Саха сиригэр 2025 сыл – Ийэ дойду көмүскээччитин сыла.
