Саха сииригэр хас бэһис өлүү тосту-туора төрүөттэн сылтаан тахсар. Судургутук эттэххэ, ааспат-арахпат, сидьиҥ ыарыттан буолбакка, атын дьайыыттан. Ол иһигэр арыгы содулуттан. Ити туһунан Ил Дархан иһитиннэрдэ.
“Биһиги төһө даҕаны доруобуйа харыстабылын инфраструктуратын сайыннардарбыт уонна аныгы технологиялары киллэрдэрбит, киһи бэйэтэ баҕарбат уонна туругун тупсарарга кыһаллыбат буоллаҕына, кини доруобуйатын харыстыыр туһунан этэр уустук. Саха өрөспүүбүлүкэтигэр бастакы миэстэҕэ сылдьар сүрэх-тымыр ыарыыларыттан өлүү кэннэ, иккис миэстэҕэ тас дьайыыттан өлүү көрдөрүүтэ турар. Хас бэһис өлүү – суол саахалын, ууга түһүү, уот-баһаар, бэйэҕэ тиийинии уонна итирик сылдьан буруйу оҥоруу содула. Алдьархай тахсыбыт төрүөтүгэр арыгы элбэхтик баар буолар”, – диэн Айсен Николаев этэр.
Итини таһынан, Ил Дархан 2022 сылтан Дьокуускайга Сүрэх-тымыр киинэ тутуллан үлэҕэ киириэҕиттэн сүрэх-тымыр ыарыыларыттан өлүү 7%-нан аҕыйаабытын санатта.
