Быйылгыттан Саха сиригэр дьадайыы таһымын икки төгүл аҕыйатар үлэ-хамнас ыытыллыахтаах. Ил Дархан Анал туһаайыытыгар былаас уорганнарыгар кытаанах соругу туруорда.
Холобур, 2018 сыллаахха Саха сиригэр дьадайыы көрдөрүүтэ 18,6% эбит буоллаҕына, 2024 сыллаахха 14%-ҥа тиийэ түспүт. Оттон 2024 сылга 13,2%-ҥа тиийиэхтээх.
“Кэлэр биэс сыл иһигэр уонунан тыһыынча Саха сирин олохтооҕо дьадайыы модьоҕотун атыллаан бигэ туруктаах олох таһымыгар тахсарын туһугар, дьадайыы таһымын икки төгүл кыччатыахтаахпыт. Биллэн турар, ити – уустук сорук. Онон, былаас, уопсастыба уонна биисинэс бииргэ үлэлиэхтээхпит”, – диир Айсен Николаев.
Кини этэринэн, табаар уонна өҥө сыаната күн-түүн ыарыы турар кэмигэр хамнас эмиэ үрдүөхтээх. Ол курдук, 2024 сыллаахха бүддьүөт эйгэтин үлэһиттэрин хамнаһын үрдэттилэр. Оттон 2025 сыл тохсунньу 1 күнүттэн бүддьүөт эйгэтигэр үлэлиир атын категориялаах үлэһиттэр хамнастара 5,7%-нан эбиллиэхтээх.
Дьарыктаах буолуу эйгэтин көрдөрүүтэ тупсубута өрөспүүбүлүкэ нэһилиэнньэтин дохуотугар үчүгэйдик дьайыахтаах. 2024 сылга өрөспүүбүлүкэҕэ үлэтэ суох буолуу көрдөрүүтэ 4,8%-ҥа тиийэ түһүөхтээҕэ. Тэрилтэлэргэ барыта 9 тыһыынча кэриҥэ үлэ миэстэтэ тахсыбыта.
Санатар эбит буоллахха, 2023 сыллаахха Айсен Николаев солотугар дьиҥ таһымнаахтык иккиһин киирэн баран, аан бастакынан дьадайыыны утары охсуһар ыйааҕы таһаарбыта.
