Бэрэсидьиэн бырагырааматын чэрчитинэн, барыта 10 тыһыынча кэриҥэ дьиэни гаас ситимигэр холбуур соруктаахтар.
Социальнай гаастааһын бырагырааматын чэрчитинэн Саха сирэ Уһук Илиҥҥэ бастакы, оттон Арассыыйаҕа ахсыс миэстэҕэ сылдьар. Ити бырагыраама 2021 сыллаахха олоххо киириэҕиттэн, барыта 8 тыһыынчаттан тахса ыал күөх төлөн ситимигэр холбонно. Ол туһунан Ил Дархан Айсен Николаев Анал туһаайыытыгар иһитиннэрбитэ уонна 2025 сылга гаастаах дьиэ ахсаанын уон тыһыынчаҕа тиэрдэргэ соруйбута.
Ил Дархан этэринэн, Саха сирин курдук тыйыс усулуобуйалаах дойдуга хомунаалынай инфраструктура туругар ураты болҕомто ууруллуохтаах. 2022 сылтан саҕалаан “Инфраструктура менюта” федеральнай бырайыак чэрчитинэн барыта 3 млрд суумалаах 14 хомунаалынай инфраструктура эбийиэгэ тутулла турар. Ол эбийиэктэр үлэҕэ киирдэхтэринэ, Мэҥэ Хаҥалас, Чурапчы, Таатта, Амма, Уус Алдан уонна Нерюнгри улуустарыгар барыта 70 тыһыынчаттан тахса киһи хаачыстыбалаах ититиинэн, уунан-хаарынан хааччыллыахтаах.
2024 сыллаахха Саха сирэ Арассыыйаҕа бастакынан хочуолунай хаһаайыстыбатыгар энерго-сиэрбис хантараагын түһэрсибитэ. Кэлэр икки сыл иһигэр “Теплоэнергосервис” хампаанньаны кытта Уус Ньараҕа ититии тиһигэ саҥардыллыахтаах. Чурапчы улууһун Хатылытыгар уонна Мэҥэ Хаҥалас Өлөчөйүгэр гаас ситимнэрэ тутуллан бүттүлэр. Күөх төлөн тиһигэ Мэҥэ Хаҥалас Лоомтукатыгар кэлэн турар.
Гааһы араарар-тыырар тиһик Дьокуускай куорат алта түөлбэтигэр тутулунна. Ол көмөтүнэн тыһыынчаттан тахса сир учаастага гааска холбонор кыахтаныа. 2025 сылга гаас утаҕа Мэҥэ Хаҥалас Сыымаҕар тиийиэҕэ. “Газпром” хампаанньалыын кыттыгас бырагыраама чэрчитинэн Ленскэй Батамайыгар, Мурьятыгар уонна Бэчинчэтигэр күөх төлөн умайыа.
“Газпрому” кытта Ленскэй улууһун алта бөһүөлэгин гааска эбии холбуурга сөбүлэстибит. Социальнай гаастааһыҥҥа Саха сирэ Уһук Илиҥҥэ бастакы, оттон дойдуга ахсыс миэстэҕэ сылдьабыт. 2021 сыллаахха бырагыраама олоххо киириэҕиттэн барыта 8,5 тыһыынча кэриҥэ ыал дьиэтигэр гаас киирдэ. Ону барытын учуоттаан туран, 2025 сылга “Сахатранснефтегаз” тэрилтэ 10 тыһыынча дьиэни гааска холбууругар соруйабын. Биһиги газовикторабыт ону кыайыахтара диэн эрэнэбин”, – диэтэ Айсен Николаев.
