Саха сирэ Уһук Илиҥҥэ киһитин ахсаана эбиллэ турар суос-соҕотох эрэгийиэн буолла. Ол туһунан Айсен Николаев ахсынньы 19 күнүгэр Судаарыстыбаннай Мунньахха Анал туһаайыытыгар иһитиннэрбитэ.
“Күн бүгүн биһиги, Саха сирин олохтоохторо, 1 мөлүйүөн 7 тыһыынча 500 киһи буоллубут. Олох уһуна, ортотунан, 73,17 сааска тэҥнэстэ. Онон биһиги Арасыыйа орто көрдөрүүтүн куоһардыбыт, оттон Уһук Илин эрэгийиэннэрин орто көрдөрүүтүн 3,5 сылынан аһардыбыт. Оҕо төрөөһүнүнэн дойду 10 бастыҥ эрэгийиэнин иһигэр киирэбит. Бу сарсыарда миэхэ анаан иһитиннэрбиттэринэн, 2024 сыл саҕаланыаҕыттан күн бүгүҥҥэ диэри 10 382 оҕо күн сирин көрбүт”, – диэн Айсен Николаев сырдатта.
Кини эбэн эппитинэн, 2024 сыллаахха Оҕо аймах сыла биллэриллибитин кэннэ Саха сиригэр икки уонна үс игирэлэр төрөөбүттэр. Холобур, үс игирэ Чурапчы улууһун олохтоохторо Елисеевтэр дьиэ кэргэннэригэр күн сирин көрбүттэр.
