Саҥа чинчийэр ньыма көмөтүнэн Саха сиригэр 57% онкология ыарыытын олох эрдэ булар буолбуттар. Ол туһунан Ил Дархан Айсен Николаев Ил Түмэҥҥэ Анал туһаайыытыгар эттэ.
2024 с. тохсунньутугар Саха сиригэр Искэн киинэ арыллыбыта. Сыл устата кииҥҥэ барыта 42 тыһыынчаттан тахса киһи сылдьыбыт. 4 тыһыынчаттан тахса эпэрээссийэ оҥоһуллубут.
“Бу кэм иһигэр Искэн киинигэр 42 тыһыынчаттан тахса, былырыыҥҥыттан 15%-нан элбэх, киһи көрдөрүннэ. 4 300 эпэрээссийэни оҥордулар (былырыыҥҥыттан 20%-нан элбэх). Саҥа чинчийэр ньыма көмөтүнэн 57% искэни саҥа саҕаланан эрдэҕинэ буллулар”, – диэн Айсен Николаев баар чахчыны кэпсээтэ.
Ил Дархан эппитинэн, 2025 сылтан онкология сулууспатын үлэтэ-хамнаһа биир кииннэниэхтээх.
“Ол түмүгэр чинчийэр-билгэлиир уонна эмтиир охсор болдьох түргэтээн биэриэхтээх, аныгы эминэн хааччыйыы тупсуохтаах, үрдүкү технология туттуллар эпэрээссийэлэрэ тиийимтиэх буолуохтаахтар”, – диэтэ Айсен Николаев.
Санаттахха, саҥа Искэн киинэ бэрэсидьиэн Владимир Путин көҕүлээһинэн баар буолбут “Доруобуйа харыстабыла” национальнай бырайыак чэрчитинэн тутуллубута. Тэрилтэҕэ үрдүк таһымнаах исписэлиистэр үлэлииллэр, балыыһа аныгы тэрилинэн толору хааччыллан турар.
Ааспыт 11 ый иһигэр Саха сиригэр бары улуустарга үлэлиир искэн ыарыыга көмөлөһөр амбулатория кииннэригэр уопсайа 88 тыһыынчаттан тахсата көрдөрүммүттэр. Ол түмүгэр 520 киһи “злокачественнай” искэннээҕэ биллибит.
