Дьокуускай куорат суута өрүс тиксэлигэр (речпорт) «куттала суох буолуу ирдэбилигэр эппиэттээбэт өҥөнү оҥорон киһи өлүүтүн таһаарбыт» тэрилтэ дириэктэригэр Афанасий Киприяновка бириигэбэр таһаарда. Дьиктитэ диэн, тиксэли бас билэр «Якутский речной порт» хампаанньаны тоҕо эрэ эппиэккэ тардыбатахтар.
Ол курдук, 2023 сыл балаҕан ыйыгар Дьокуускайдааҕы өрүс тиксэлигэр күүстээх тыал түспүтүгэр оҕолоругар ыалдьыттыы кэлбит дьахтарга ыарахан ыйааһыннаах тимир баннер сууллубута. Ыал ийэтэ, эбэтэ ыарахан эчэйииттэн үс күнүнэн тыына быстыбыта. Суут Киприянов салайар тэрилтэтин үлэһиттэрэ сууллубут баннеры оҥорууга куттала суох буолуу ирдэбилин тутуспатаҕын дакаастаата. Онон, Саха сиринээҕи тырааныспар борокуруорун санаатын учуоттаан, буруйданааччы көҥүлүн 3 сылга болдьохтоох быһарга уонна 250 тыһ. солк. ыстараапка уурда.
Санаттахха, Дьокуускайдааҕы өрүс тиксэлин Москубатааҕы «Старвей» хампаанньалар бөлөхтөрө 2017 сыллаахха атыылаһан ылбыта. Ол эбэтэр, тиксэлгэ баар эбийиэктэргэ куттал суол буолуутун бу тэрилтэ хааччыйыахтааҕа буолуо дии? Ону баара, буруй барыта биир эрэ киһиэхэ тигистэ.
Бэйэ кэр.
