Ахсынньы 25 күнүн киэһэтигэр Бүлүү улууһун Лөкөчөөнүн таһыгар хас да киһи өлүүлээх улахан суол саахала буолла. Ол иэдээҥҥэ 3 улахан киһини кытта уу кыһыл оҕо тыына быстыбытын Бүлүү улууһун дьаһалтата бигэргэттэ.
“Үс массыына кыттыылаах суол саахала киэһэ 19:00 чаас саҕана буолла. Үс улахан киһи уонна биир саҥа төрөөбүт оҕо өллүлэр. Эмсэҕэлээбит дьон эмиэ баар”, – диэн СИА-ҕа Бүлүү улууһун дьаһалтатыгар эппиттэр.
МЧС Саха сиринээҕи салаатын пресс-сулууспата суруйбутунан, массыыналар уун-утары харсыспыттар.
“Барыллаан информациянан, түөрт киһи өллө, онтон биирэ оҕо. Үс киһи эчэйдэ. Ол иһигэр биир оҕо. Өлбүт уонна эчэйбит дьон кимнээҕин быһаараллар”, – диэн бэдэмистибэ суруйар.
Бэҕэһээ киэһэ суол быһылаана буолбут сиригэр РСЧС 13 исписэлииһэ уонна 5 тиэхиньикэ үлэлээтэ.
СӨ Доруобуйа харыстыбалыгар министиэристибэтэ эппитинэн, мэдиссиинэ көмөтүн оҥорорго Бүлүүттэн суһал көмө икки биригээдэтэ айаннаабыт, ол иһигэр неонатолог-быраас. Саахал буолбут сиригэр Лөкөчөөнтөн уонна Илбэҥэттэн эбии быраастаах сиэстэрэ тиийбиттэр. Дьокуускайтан сан-авиация көтүөхтээх.
МЧС Саха сиринээҕи салаата кэлин эбэн эппитинэн, эчэйбит дьону суһаллык Лөкөчөөн балыыһатыгар илдьибиттэр. Миэстэтигэр полиция үлэһиттэрэ, медиктэр уонна өрөспүүбүлүкэ баһаарынайдара үлэлииллэр – барыта 22 киһи уонна 9 тиэхиньикэ.
Өссө да бигэргэнэ илик чахчынан, тыына быстыбыт оҕо баара-суоҕа алта хонуктааҕа эбитэ үһү – Дьокуускайга төрөөн баран, выписка кэннэ ийэтин кытта дойдулаан испит.
Саахал тахсыбытынан сибээстээн, Бүлүү улууһун борокуратуурата бэрэбиэркэ ыытан эрэ. Улуус борокуруора быһылаан буолбут сиригэр айаннаабыт.
Кэлиҥҥи, ахсынньы 26 күнүнээҕи чахчыларынан, Саахал мэдиссиинэтин үлэһиттэрэ "Полярные авиалинии" АХ бөртөлүөтүнэн эчэйбит дьону Дьокуускайга аҕалбыттар. Улахан дьон 2-с №-дээх өрөспүүбүлүкэтээҕи балыыһаҕа, оттон кыһыл оҕо принатальнай кииҥҥэ киирбиттэр.
