СӨ Бырабыыталыстыбатын мунньаҕар Нерюнгри куоракка үлэлии тиийбит быраастарга 1 мөл. солк. төлөбүрү оҥоруу бэрээдэгин бигэргэттилэр. Ол быһыытынан, мэдиссиинэ үлэһиттэрэ Нерюнгри куорат эмтиир тэрилтэтин кытта дуогабар түһэрсэн биэс сылтан итэҕэһэ суох кэмҥэ үлэлиэхтээхтэр.
«Бу уураах Нерюнгри оройуонугар мэдиссиинэ тэрилтэлэрин үлэһиттэринэн хааччыйар уонна нэһилиэнньэҕэ тэрилтэни кытта бырааһы таларга кыах биэрэр соруктаах», – диэн бырабыыталыстыба бэрэссэдээтэлэ Кирилл Бычков бэлиэтээтэ.
Санаттахха, Ил Дархан Айсен Николаев быйылгы Ил Түмэҥҥэ Туһаайыытыгар Нерюнгри оройуонугар доруобуйа харыстабылын аныгылыы саҥардыы түмүктэниэхтээҕин эппитэ. Ол курдук, быйыл оройуон киин балыыһатын 8 блогун саҥаттан туппуттар, суолун өрөмүөннээбиттэр. Оттон эһиил ирдэнэр тэрилинэн толору хааччыйыахтара.
Хаартыска: Саргына Скрябина, СИА