Саҥа дьыл бырааһынньыгын эрэ иннинэ, ахсынньы 26 күнүгэр, Саха сиригэр 9 социальнай эбийиэк арылынна. Ол иһигэр айымньы дьиэтэ, оскуола, доруобуйа харыстабылын уонна успуорт эбийиэктэрэ.
Ханнык улууска туох арылынна:
- Амма улууһун Соморсун нэһилиэгэр В.Е. Васильев аатынан Норуот айымньытын дьиэтэ;
- Алдан улууһун Томмот куоратыгар И.Н. Касьяненко аатынан Томмотооҕу оҕо ускуустубатын оскуолата;
- Үөһээ Бүлүү улууһун Нам бөһүөлэгэр Айымньы дьиэтэ;
- Үөһээ Бүлүү улууһун Сургуулук нэһилиэгэр ини-бии Боескоровтар ааттарынан Сургуулук орто оскуолата;
- Ньурба улууһун Ынахсыт нэһилиэгэр Н.И. Кочнев аатынан Хаҥаластааҕы орто оскуола;
- Сунтаар улууһун Элгээйи нэһилиэгэр Сунтаардааҕы киин балыыһа салаата;
- Сунтаар улууһун Сунтаар сэлиэнньэтигэр Култуура уонна успуорт комплекса;
- Уус Алдан улууһун Бороҕон сэлиэнньэтигэр Дьиэ кэргэҥҥэ элбэх өҥөнү оҥорор киин (МФЦ);
- Хаҥалас улууһун Төхтүр бөһүөлэгэр “Кэнчээри” оҕо уһуйаана.
“Өрөспүүбүлүкэ олохтоохторугар бу курдук үөрүүлээх күн биһиги харгыстартан, уустуктартан толлон тохтообокко, дойдуну барытын кытта иннибит диэки баран иһэбит диэн эрэл санаа үөскүүр. Инникигэ эрэллээх санаалаах биһиги олоҕу бииргэ тупсарабыт”, – диэн Ил Дархан Айсен Николаев телеграм-каналыгар суруйар.
Ити эбийиэктэр “Үөрэҕирии”, “Доруобуйа харыстабыла”, “Дьиэ-уот уонна куорат эйгэтэ” национальнай бырайыактар, “Тыа сирин кэлим сайдыыта” судаарыстыбаннай уонна эрэгийиэннээҕи инвестициялаах бырагыраамалар чэрчилэринэн тутуллубуттар.
“Биһиги өрөспүүбүлүкэбитигэр дьон туһугар оҥоһуллар туох барыта хаачыстыбалаах уонна тагыбагастаах буолуохтаах диэн эрэнэбин. Саамай сүрүнэ ити эбийиэктэр дьон кыаҕын арыйыахтаахтар. Саҥа, аныгы сэбилэнии уонна оборудование куораттарбытыгар эрэ буолбакка, тыабыт сиригэр эмиэ баар буолуохтаах. Ити бырайыактааччыларга, тутааччыларга, тустаах министиэристибэлэргэ уонна олохтоох бэйэни салайыыныы уорганнарыгар улахан эппиэтинэс”, – диэн Айсен Николаев суруйар.
