Эр киһи аҕатын биэнсийэтин суйдаан ылбыт түөкүттэри бэйэлэрин албыннаабыт.
Тайбаан арыы олохтооҕо кырдьаҕас киһи түөкүттэр угаайыларыгар киирэн, барыстаах дьыалаҕа харчы угабын (инвестиция) дии санаан, 700 тыһыынча тайбаан дуолларыттан ытыс соттубут (2 мөл. солк. кэриҥэ). Оҕонньор ботуччу харчыны баһан ылаары үбүн-аһын барытын дьоҥҥо ыытан баран, кыайан төттөрү ылбатах.
Ол гынан баран, оҕонньор уола киһи уоллаахпын диир уола буолан биэрбит – аҕатын харчытын төттөрү өҕүтэн ылаары былаан бөҕө оҥостубут, хас биирдии дьайыытын эрдэттэн аахпыт-суоттаабыт.
Эр киһи хас даҕаны СИМ-каартаны атыылаһан, түөкүттэргэ үс тус-туспа киһи аатыттан “кырдьаҕас аймахтарабыт, биһиги эмиэ байыахпытын, харчылаһыахпытын баҕарабыт” диэн суруйбут. Кыһыл тылынан албаҕалаан, түөкүттэр өйдөрүн үлтү ытыйан, тылыгар киллэрбит уонна “бастаан биир кыра дьыаланы быһаарыахпын 700 тыһыынча тайбаан дуоллара наада” диэн, харчы көрдөөбүт.
Биллэн турар, түөкүттэр бастаан утаа сэрэхэдийбиттэр эрээри, оботтоох санаалара батарбакка, “кырдьаҕас аймахтарыгар” барыта 700 тыһыынча дуоллары ыыппыттар. Ол айыыта онон. Уол харчыны ылан баран, мэлийэн хаалбыт. Аҕата уордарбыт харчытын төттөрү өҕүтэн ылбыт.
Түөкүттэр да дьон буоллаҕа. Онон, сатаан дьаһаннахха, кинилэри эмиэ албынныахха, угаайыга киллэриэххэ сөп.
