Тохсунньу, үгэс курдук, саамай аҕыйах үлэ күннээх ый. 2025 с. бастакы нэдиэлэтигэр 2 эрэ күн үлэлиибит. Ол гынан баран, онтон сылтаан тохсунньутааҕы хамнас быһаҕас дуу, толору дуу буоларын туһунан “SuperJob” тэрилтэ юриһа Александр Южалин кэпсиир.
– РФ Үлэҕэ кодексын 112-с ыстатыйатын быһыытынан, ханнык да ыйга бырааһынньык уһун өрөбүллэрэ бигэргэммит акылааттаах үлэһиттэр хамнастарыгар дьайбат. Онтон сылтаан кинилэр хамнастарыгар сүүйтэрбэттэр.
Оттон чааһынан эбэтэр кэпсэтиинэн (сдельнай) бигэргэммит хамнастаахтарга бырааһынньык күннэрэ дьайыахтарын сөп. Ол барыта үлэһит бу ыйга хас күн-чаас үлэлиириттэн, төһө кээмэйдээх үлэни толороруттан тутулуктаах буолар. Ол гынан баран, оннук хамнастаах киһи бырааһынньык күннэригэр үлэҕэ тахсар буоллаҕына, хамнаһа икки бүк ааҕыллыахтаах.
Акылааттаах хамнастаах дьон биири дьиктиргиэхтэрин сөп. Тохсунньу бастакы аҥаарынааҕы хамнас (тохсунньу “абаансата”) арыый кыра буолуон сөп. Тоҕо диэтэххэ, сокуон быһыытынан, хамнас ыйга иккитэ төлөнөр: ый бастакы аҥаарынааҕы “абаанса” уонна ый бүтүүтүгэр бүтэһиктээх оросчуот. Оттон хамнас киһи хас күн үлэлээбитинэн ааҕыллан төлөнөр. Онон, тохсунньутааҕы “абаансаҕа” аҕыйах үлэ күнэ эрэ ааҕыллан киирэр (элбэх бырааһынньык, өрөбүл баарынан) буолан, кээмэйэ кыра буолуохтаах. Ол гынан баран, ый иккис аҥаарыгар ону барытын толуйуохтаахтар. Түмүгэр, ылыахтаахпытын барытын ылыахпыт.
