Саҥа дьыл инниттэн сойон саҕалаан тохсунньу 4 күнүгэр, халлаан –45 –50 кыраадыска тиийэ тымныйан турдаҕына, хочуолунайа алдьанан тоҥор кутталга киирбит Эдьигээн сэлиэнньэтигэр уонна тохсунньу 1 күнүгэр хочуолунайа умайбыт Бэстээх сэлиэнньэтигэр кэмниэ-кэнэҕэс киһилии олох эргиллэр.
Санатар буоллахха, Эдьигээҥҥэ 3000 нэһилиэнньэлээх сэлиэнньэни хааччыйар «Кыайыы 65 сыла» хочуолунайга, хас даҕаны хочуол алдьанан, дьиэлэр тоҥон барбыттара, бассаабынан көмө көрдүү суруктар, хампы барбыт батареялар хаартыскалара тарҕаммыттара. Олохтоохтор, ким туох кыахтааҕынан: сорох уокка холбонор тэриллэринэн, сорох тимир оһохторунан сылыттан олороллоро биллибитэ. Онуоха, уот ситимэ кыайбакка, сылытар тэрили кэмчилээн туттарга күһэллибиттэр этэ. Оттон тохсунньу 1 күнүгэр Эдьигээн улууһун Бэстээх сэлиэнньэтигэр хочуолунай умайан, биир элбэх кыбартыыралаах дьиэ, түөрт чааһынай дьиэ, оскуола уонна уһуйаан сылытар ситимэ суох хаалбыттара.
Эдьигээн саахалын туһунан Арассыыйа ситимнэрэ киэҥник суруйдулар. Олохтоохтор хочуолунай үлэтэ кэһиллибитэ ырааппытын, ону оҥороору сапчаас көрдөөбүттэрэ икки сыл буолбутун бэлиэтииллэр эбит. Норуодунай фронт Саха сиринээҕи салаатын сүрүннээччи Дмитрий Паньков СӨ ОДьКХ министиэристибэтигэр саахал төрүөтүн быһаарарыгар уонна маннык быһыы-майгы аны хатыламматын туһугар кытаанах миэрэни ыларыгар модьуйуу уонна СӨ Борокуратууратыгар ирдэбил ыыппыттарын туһунан суруйар.
Бүгүн CӨ ОДьКХ мунньаҕар Эдьигээн «Кыайыы 65 сыла» хочуолунайын 8 хочуолуттан 7 хочуол үлэлии турарын, холбоммут эбийиэктэр сылыйан эрэллэрин, Бэстээх эбийиэктэрин уотунан сылытыыга көһөрбүттэрин дакылааттаатылар.
Бэйэ кэр.
