Бэҕэһээ, тохсунньу 13 күнүгэр Арассыыйа бэчээтин күнэ киэҥ далааһыннаахтык бэлиэтэннэ. Ааспыт сыл түмүгүнэн бастыҥ үлэлээх суруналыыстары Ил Түмэҥҥэ ыҥыран бэлиэтээтилэр уонна Арассыыйа суруналыыстарын Саха сиринээҕи салаатын бириэмийэлэрин туттардылар. Күрэс түмүгүнэн «Кыым» хаһыат «Сыл бастыҥ өрөспүүбүлүкэтээҕи таһаарыыта» буолла.
Ааспыт сыллааҕы көрдөрүүнэн, хаһыат бэчээттэнэн тахсар ахсаана -13 150. Бу Уһук Илиҥҥэ эрэ буолбакка, Арассыыйа үрдүнэн сөҕүмэр көрдөрүү. Мантан 10 тыһыынча кэриҥэ сурутуунан Саха сирин бары муннуктарынан тарҕанар. Онон, «Кыым» хаһыат Саха сирэ саамай ааҕар эрэгийиэн буолуутугар, уопсастыба сайдыытыгар уонна саха тылын тарҕаныытыгар сүҥкэн суолталаах.
Түгэнинэн туһанан, эрэдээксийэ аатыттан бары сурутааччыларбытыгар уонна ааҕааччыларбытыгар ис сүрэхтэн махтанабыт. Үүммүт сыл эһиэхэ үгүс үтүөнү, ситиһиини, табыллыыны аҕаллын. Иллээх-эйэлээх, уйгулаах-быйаҥнаах, сайдыылаах олоҕу бары бииргэ уһансыаҕыҥ.
"Кыым" хаһыат эрэдээксийэтэ.
Сэҥээриилэр
Дьиҥнээх норуот хаһыата.
О5о эрдэхпиттэн аа5а улааппыт хаһыатым. Бу уустук кэмҥэ сөҕүрүйбэккэ кытыаста тураргытын сөҕөбүн уонна үөрэбин!
Сайда, кэҥии туруҥ!