Киир

Киир

«Амма» кээпэрэтиип оҥорон таһаарар сыырын Москубаҕа уонна Благовещенскайга атыылыыр буолбуттар. Бородууксуйаны голландия рецептуратынан олохтоох үрүҥ аһынан оҥороллор. Манна улуус сымнаҕас килиимэтэ уонна отун-сибэккитин эгэлгэтэ төһүү буолар.

Кээпэрэтиип бэрэссэдээтэлэ Айыысиэн Черноградскай этэринэн, сыыры Арассыыйа киин куоратыгар 2022 сылтан 100-түү киилэни ыытан атыылыыллар эбит, оттон былырыыҥҥыттан 300-түү киилэни ыытар буоллулар. Оттон соторутааҕыта бөдөҥ эргиэмсиктэри кытта дуогабар түһэрсэн логистика кыһалҕатын быһаарда. Амма сыырын араас эрэгийиэн дегустатордара амсайан баран пармезан уонна сэбиэскэй сортарга майгыннаппыттар. 2023 сыллаахха кээпэрэтиип 8 туонна сыыры оҥорон таһаарбыт. Бу кээмэйэ улаатар чинчилээх. Маны таһынан, «Амма» кээпэрэтиип үүт аһылыгы, полуфабрикаты, отон утаҕын, сироптары уонна барыанньаны оҥорон таһаарар.

5204018998923094658

Бэйэ кэр.: Амма сыырын өрөспүүбүлүкэ таһыгар атыылыыр буолбуттара, биллэн турар, барыбытын үөрдэр. Ол эрээри бу сыыры ылан сиир Саха сирин олохтооҕо бэрт аҕыйах буолуохтаах диэн сэрэйэбит. Атын сиртэн кэлбит сыырдартан сыаната икки төгүл кэриҥэ ыарахан буолааччы. Судаарыстыбаттан өйөбүлү син ыла сылдьар тэрилтэ буолуо эбээт. Бастаан бэйэ дьоно ылан сиирин ситиһэн баран таска таһаарара тоҕо сатаммата эбитэ буолла? Ол эбэтэр, били Ил Дархаммыт өрөспүүбүлүкэни олохтоох аһынан-үөлүнэн толору хааччыйар, үрүҥ аһы дэлэтэр дьаһала, мунньахтарга эрэ дуорайан баран, умнуллан эрдэҕэ?

5204018998923094661

Манна даҕатан эттэххэ, аҕыйах хонуктааҕыта "Мясной дворга", "Фермергэ" кэлии да, олохтоох да сыыр сыта да суоҕа. Оттон сыырдара барыларыттан чэпчэки уонна элбэх диэн сылдьар "Скиф" маҕаһыыммар аҕыйах көрүҥ баарыгар 900 солкуобайтан 1400 cолкуобайга тиийэ үрдэппиттэр. Олохтоох дьону хааччыйан бүтүҥ, Москубаны хааччыйыҥ диэн дьаһал таҕыста дуу диэх айылаах...

Сонун төрдө: СИА

Санааҕын суруй

Бүтэһик сонуннар