Быйыл эмиэ 50 бастыҥ үлэһиккэ Ил Дархан 300 тыһ. солк. кээмэйдээх бириэмийэтин туттарыахтара. Сайаапкалары туһааннаах министиэристибэҕэ эбэтэр биэдэмистибэҕэ кулун тутар 1 күнүгэр диэри ыытар ирдэнэр. Аччыгый уонна орто урбаан субъектара СӨ Урбаан, атыы-эргиэн уонна туризм министиэристибэтигэр ыыталлар.
Бириэмийэ күрэҕэр Саха сиригэр олорор уонна үлэлиир дьон сааһыттан уонна ыстааһыттан тутулуга суох кыттыахтарын сөп. Тэрилтэ салайааччылара уонна солбуйааччылара, бааһынай (пиэрмэр) уонна таба иитэр хаһаайыстыбалартан ураты, кыттар бырааптара суох. Бастыҥ үлэһити хайа баҕарар тэрилтэ кытыннарыан сөп.
Кыттааччылары сүүмэрдээһин үс түһүмэҕинэн буолар. Туһааннаах министиэристибэ сайаапкалары талан СӨ Үлэҕэ уонна социальнай сайдыыга министиэристибэтигэр ыытар. Оттон кыайыылаахтары Бырабыыталыстыба иһинэн үлэлиир хамыыһыйа быһаарар уонна ыам ыйын 1 күнүгэр биллэрэр.
Ыйыталаһар нүөмэрдэр: 8(4112)-508-069, 8(4112)-508-076
Сонун төрдө: СӨ Үлэҕэ уонна социальнай сайдыыга министиэристибэтэ