Дойду барыбааталыстыбатын дьаһалынан, олунньу 1 күнүттэн социальнай төлөбүр түөрт уонча араас көрүҥэ 9,5%-нан үрдээтэ. Туһааннаах докумуоҥҥа премьер-миниистир Михаил Мишустин илии баттаабыт.
РФ Үлэҕэ уонна социальнай сайдыыга министиэристибэтэ иһитиннэрэринэн, ол иһигэр Аҕа дойду Улуу сэриитин уонна бойобуой дьайыылар кыттыылаахтарыгар, Чернобыль саахалын туоратыспыттарга, Арассыыйа, Үлэ Дьоруойдарыгар, бары инбэлииттэргэ төлөнөр харчы эбиллиэхтээх.
Оҕолоох ыалга бэриллэр төлөбүр эмиэ индексацияланыахтаах. Ол курдук, ийэ хапытаала үрдээбит: бастакы оҕоҕо – 690,3 тыһ. солк., иккискэ уонна онтон кэлэр оҕоҕо – 912,2 тыһ. солк. Оҕо төрөөтөҕүнэ бэриллэр биир кэмнээх төлөбүр 26,9 тыһ. солк. буолуо.
Итини таһынан, бэрэсидьиэн дьаһалынан мантан антах инбэлиит оҕолорун уонна оҕо эрдэхтэриттэн 1-кы курууппалаах ибэлиити көрөн олорор дьон төлөбүрэ сыл аайы индексацияланар буолбут. Урут ол харчы кубулуйбат биир суумалаах буолара.