Бырабыыталыстыба салалтатын мунньаҕар Ил Дархан Айсен Николаев тус сорудахтара төһө туолан иһэллэрин бэрэбиэркэлээтэ. Кини сорудаҕы мөлтөхтүк толоруу иһин дисциплинарнай миэрэҕэ тардар санаалааҕын биллэрдэ уонна ааспыт сылга сорудахтары толоруу таһыма уруккутааҕар үрдүгүн бэлиэтээтэ.
Мунньахха Бэрэсидьиэн Владимир Путин көҕүлээбит саҥа национальнай бырайыактарын, итиэннэ Ил Дархан Стратегическай ыйаахтарын олоххо киллэрии туһунан кэпсэттилэр. Маны сэргэ, Айсен Сергеевич оҥоһуу өйү олох бары эйгэтигэр, ол иһигэр судаарыстыбаны салайыыга туһанар, килиэйэннэри кытта үлэҕэ «Судаарыстыба дьон туһугар» федеральнай бырайыак ирдэбилинэн 3 сулустан намыһаҕа суох таһымы ситиһэр соруктары туруорда.
Үүммүт сылга хомунаалынай тэрилтэлэргэ тарыып араастаһыытыгар бэриллэр субсидия кээмэйин намтатарга, хомунаалынай инфраструктураны аныгылыы оҥорорго, нэһилиэнньэлээх пууннары сылааһынан, уунан хааччыйыы исхиэмэлэрин олоххо киллэрэргэ чопчу сорудахтар бэриллибиттэр. Маны таһынан, ойуурдары тилиннэрэр тэрээһиннэр, намыһах дохуоттаах дьиэ кэргэннэри өйөөһүн, тыа хаһаайыстыбатын бородууксуйатын саҥа көрүҥнэрин үөскэтии, кыра кэмпилиэктээх оскуолалар бырайыактарын оҥоруу уонна да атын сорудахтар киирбиттэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата