Муус Устар-2024» бэстибээл «Бастыҥ эдэр асчыт» хайысхатын кыайыылааҕа Петр Аммосов төрүт куукуна ураты амтанын Пензатааҕы норуоттар икки ардыларынааҕы «Толстопятый» бэстибээлгэ билиһиннэрдэ.
Кини Алексей Юнчанов диэн кэллиэгэтиниин ыалдьыттарга тоҥ балыгы кыһан, муҥур балыктан, таба уонна убаһа этиттэн күндү аһы астаан, отонноох десерт уонна тайҕа отунан-маһынан чэй бэлэмнээн амсаттылар. Мустубут дьон маны барытын олус сөбүлээбиттэрин туһунан тэрийээччилэр иһитиннэрдилэр. «Элбэх оҕолоох дьиэ кэргэҥҥэ төрөөбүт буоламмын, кырабыттан астыыбын. «Муус Устарга» кыттан ордук эппиэтинэстээх буоллум. Оттон кыайыым саҥа ситиһиилэргэ көҕүлээтэ», — диэн Петр сэһэргиир.
Эдэр асчыт бастакы уһуйааччыта «Саха сирин» амтана бэстибээл кыайыылааҕа, шеф-повар Александр Бисовки эбит. Билигин кини «Республика» эрэстэрээҥҥэ шеф-повар Герман Усовка үөрэнэ сылдьар.
Сонун төрдө: CӨ Бырабыыталыстыбатын уонна Ил Дарханын пресс-сулууспата