Өлүөнэ күргэтэ тутулла турар. Бу күннэргэ “ВИС” хампаанньа Дьокуускайга иккис буурдуур массыынаны уонна анал авто-кырааны аҕалла. Өрүс илин кытылыгар сыбаайалары түһэрэн барыахтара. Үлэ аҕыйах хонугунан саҕаланыахтаах. Күргэ атахтарын илин уонна арҕаа кытылларга тэҥинэн түһэриэхтэрэ.
Күргэ өрүс илин өттүттэн киириитэ арҕааҥҥытааҕар уһун буолуохтаах. 26 атах туруохтааҕыттан 19-һун ол өттүгэр түһэриэхтэрэ. Ону таһынан тутууга халаан уута суоһаабатын диэн Тамма үрэх сүнньүн көһөрөн эрэллэр. Үлэ 50-ча бырыһыана бүппүт. 127 тыһыынча буор-кумах хаһыллыахтааҕыттан 61 тыһыынчатын тиэйбиттэр.
Арҕааҥҥы кытылга сыбаайалары эмиэ түһэрэ сылдьаллар, бетон кутуллуохтаах каркаастарын сыбааркалыыллар. Сыбаайалар бетоннара көннөрү бетонтан ураты буолар. Тымныы күннэргэ кутуллубат. Ол да буоллар тымныы күҥҥэ атын үлэ тохтообот.
Санаттахха, күргэ бэйэтэ 4,6 км усталаах буолуохтаах. Оттон киирэр-тахсар суолун аахтахха – 14,5 км.
