Кыайыы былааҕын Нам улууһуттан Хаҥалас улууһугар үөрүүлээхтик туттарыы олунньу 7 күнүгэр Дьокуускай куорат кыраныыссатыгар буолла. Былааҕы Нам улууһун баһылыгын бастакы солбуйааччы Анатолий Павлов туттарда. Олунньу 11 күнүгэр Кыайыы былааҕын Горнайга тиэрдиэхтэрэ.
«Хаҥалас улууһуттан Аҕа дойду сэриитигэр 2194 киһи барбыт, итинтэн 1134 кыргыһыы хонуутугар охтубут. Кинилэри кэриэстээн Покровскай куоракка мемориальнай комплекс тутуллубута. Улуу Кыайыы 80 сылын көрсө бу күн улууспутугар Кыайыы уонна эйэ сыла биллэриллиэ», - диэн улуус баһылыгын социальнай боппуруостарга солбуйааччыта Юрий Никифоров иһитиннэрдэ.
«Кыайыы былааҕа» эстафета саҕаланыытын Ил Дархан Айсен Николаев биллэрбитэ. Былаах хайыы үйэ Мэҥэ Хаҥалас, Амма, Уус Майда, Алдаҥҥа, Нерюнгри, Уус Алдан, Чурапчы, Таатта, Томпо, Өймөкөөн, Кэбээйи уонна Нам улуустарыгар сырытта.
Сонун төрдө: СӨ Бырабыыталыстыбатын уонна Ил Дарханын пресс-сулууспата
