Олунньу 23 күнүгэр “Россия” ханаалга суруналыыс Андрей Малахов Аҕа дойду көмүскээччилэригэр анаммыт анал биэриитэ тахсыаҕа. Саха сириттэн онно номоххо киирбит “Алеша” экипаһын оператор-наводчига, Арассыыйа Дьоруойа Алексей Неустроев кыттыаҕа. Ол туһунан СИА-ҕа Уус Алдан улууһун Байаҕантай нэһилиэгин баһылыга Савва Егоров иһитиннэрбит.
Санаттахха, дойду бэрэсидьиэнэ Владимир Путин 2023 сыл атырдьах ыйын 8 күнүнээҕи ыйааҕынан, Алексей Неустроев уһулуччу хорсун быһыытын иһин, эмиэ “Алеша” экипаһын чилиэнэ, Сунтаар хоһууна Филипп Евсееви кытта, “Кыһыл көмүс Сулус” мэтээлинэн наҕараадаламмыта.
Кинини кытта биэриигэ “Русский характер” бөлөх солиһа, бойобуой дьайыы бэтэрээнэ, норуодунай артыыс, “Русский танк “Алеша” ырыаны айбыт Юрий Кононов, эмиэ 2023 с. атырдьах ыйын 8 күнүгэр Арассыыйа Дьоруойа буолбут лейтенант Александр Леваков, о.д.а. кыттыахтара.
