ЫТЫКТАБЫЛЛААХ САХА СИРИН ОЛОХТООХТОРО!
Саха Өрөспүүбүлүкэтин салалтатын уонна тус бэйэм ааппыттан төрөөбүт тыл уонна сурук-бичик күнүнэн ис сүрэхпиттэн эҕэрдэлиибин!
Төрөөбүт тылы харыстааһын уонна сайыннарыы – глобализация үйэтигэр судаарыстыба ыытар бэлиитикэтин тумус суолталаах хайысхаларыттан биирдэстэрэ, уопсастыба, билим, үөрэх, култуура тэрилтэлэрин, муниципалитеттар биир ситимнээх үлэлэрин эйгэтинэн буолар.
Арассыыйа Федерациятын Бэрэсидьиэнэ Владимир Владимирович Путин бары норуоттар тылларын чөл хаалларыы элбэх омуктаах дойдубутугар сүҥкэн суолтатын бэлиэтээбитэ уонна быраап, үп-харчы өттүнэн уонна ис хоһоонунан тустаах хааччыллыылаах буолуохтааҕын ыйбыта.
Биһиги өрөспүүбүлүкэбитигэр Бастакы Бэрэсидьиэммит Михаил Ефимович Николаев бэйэтин ыйааҕынан өссө 1996 с. Төрөөбүт тыл уонна сурук-бичик күнүн олохтообута. Онтон ыла бу күнү биһиги сыллата бэлиэтиибит. Ити иннинэ 1992 с. “Саха Өрөспүүбүлүкэтигэр тыллар тустарынан” өрөспүүбүлүкэ сокуона бигэргэммитэ.
Төрөөбүт тылы оҕо аймах умсугуйан үөрэтэригэр бүгүн дьоһун болҕомто ууруллар. Төрөөбүт тыл туттуллар эйгэтин кэҥэтии сүрүн сорукпутунан буолар.
Онуоха өрөспүүбүлүкэ судаарыстыбаннай уонна дьиҥ таһымнаах тылларын чөл хаалларыы уонна сайыннарыы судаарыстыбаннай бырагырааматыгар көрүллэр үп икки төгүл улаатта – 2023 сылтан суумата 100 мөл. солкуобайга диэри эбилиннэ. Ол түмүгэр дьоһун суолталаах бырайыактары олоххо киллэрэр кыах үөскээтэ. Тэлэбиидэнньэҕэ, араадьыйаҕа, социальнай ситимнэргэ аналлаах төрөөбүт тылынан контент чопчуланна, смартфоннарга тустаах сыһыарыылар тахса тураллар. Уус-уран литэрэтиирэ сыыппараҕа көһөрүллэр, босуобуйалар тахсаллар, төрөөбүт тылы үөрэтэр кыах кэҥиир. Үөрэх федеральнай стандартыгар сөп түбэһиннэрэн төрөөбүт тылынан үөрэх кинигэлэрин ырытан оҥорор үлэ барар.
Социальнай суолталаах литэрэтиирэ тахсарыгар сыл ахсын субсидия бэриллэр. Оскуола бибилэтиэкэлэрин уус-уран, кыраайы үөрэтэр литэрэтиирэнэн, ол иһигэр төрөөбүт тылларынан тахсар кинигэлэринэн, хааччыйарыгар Саха Өрөспүүбүлүкэтин Үөрэҕин уонна билимин министиэристибэтигэр сорудах бэриллиннэ. Тыа сирин уонна куорат бибилэтиэкэлэрин базатыгар оҕо төрөөбүт тылынан ааҕарын, тыл уонна этнокултуурунай эйгэни киэҥник тарҕатар кииннэр тэриллиэхтэрэ.
Өрөспүүбүлүкэ норуоттарын төрөөбүт тылларынан саҥарар “Тооку” ханаал үлэтин саҕалаата. Арассыыйа биллэр ойуулуктарын сахалыы саҥардар уонна элбэх сиэрийэлээх ойуулуктары оҥорор үлэ салҕанар. Киэҥ эйгэҕэ тарҕанар сыыппара контена баар буолуохтаах, уонна ону бары – оскуолаҕа, дьиэ кэргэҥҥэ, судаарыстыбаҕа уонна биисинэскэ туһаныахтаахпыт. Өрөспүүбүлүкэ Билимнэрин академиятын базатыгар Тылы үөрэтэр, чөл хаалларар уонна сайыннарар киин уонна Саха Өрөспүүбүлүкэтин Бырабыыталыстыбатыгар Тиэрмин хамыыһыйата Саха сирин норуоттарын тылларын сайыннарыыга кэлим үлэни ыыталлар. Үөрэх эйгэтигэр 2025 сыл биир сүрүн тэрээһининэн Саха тылын, литэрэтиирэтин уонна култууратын учууталларын III өрөспүүбүлүкэтээҕи сийиэстэрэ буолуоҕа.
Күндү доҕоттор! Бүгүҥҥү үөрүүлээх күҥҥэ өрөспүүбүлүкэбит норуоттарын төрөөбүт тылларын уонна суруктарын-бичиктэрин чөл хаалларарга туруулаһар бар дьоммор махтанабын! Барыгытыгар үтүөнү уонна эйэни, этэҥҥэ буолууну уонна дьолу, ситиһиилэри уонна табылыыны баҕарабын!
Саха Өрөспүүбүлүкэтин Ил Дархана А.С. Николаев.
Хаартыска: Андрей Сорокин/СИА
