Төрөөбүт тыл уонна сурук-бичик күнүн көрсө Саха сирин бары почталарыгар, Дьокуускайга “Горпечать” киоскаларыгар олунньу 6 күнүгэр кэккэ төрүөтүнэн бэчээттэмэтэх уонна бүгүҥҥү саҥа нүөмэр атыыга таҕыстылар, суруппут дьоҥҥо бүгүҥҥүттэн тиийэн барыахтара.
Хаһыаппыт биир нэдиэлэ тохтоон ылбыт төрүөтэ туоратыллан, Ю.А. Гагарин аатынан типография салалтатын кытта биир тылы булан, сылы быһа сыана хамсаабакка үлэлиир дуогабара илии баттанна. Мөккүөрдээх боппуруоһу быһаарыыга суолта ууран быһаччы кыттыытын иһин СӨ Инновацияҕа, сыыппаранан сайдыыга уонна инфокоммуникационнай технологияларга миниистирэ В.В. Ефимовка улахан махталбытын тиэрдэбит.
Хаһыаппыт сыл устата Саха сирин киэҥ киэлитинэн бары улуустарга, нэһилиэктэргэ сурутааччыларбытыгар, ааҕааччыларбытыгар нэдиэлэ аайы күүтүүлээх ыалдьыт буолан тиийэр буолла диэн үөрүүлээх сонуммутун үллэстэбит. Ааспыт нэдиэлэ устатын тухары хаһыат тахсыбатаҕыттан тыһыынчанан саха дьоно барахсаттар долгуйан, көмүскэһэн, өйөөн куйаар ситиминэн тарҕаппыт суруктаргыт эрэдээксийэҕэ саамай күндү бэлэх буоллулар уонна хаһыаппыт инники дьылҕатын түстүүр оруолланнылар.
Саха элбэх бастыҥ, биллэр дьоно ыйааһыннаах, ыллыктаах үтүө тылларын хаһыат көмүскэлигэр эттилэр. Боростуой тыа дьоно хаһыаты быыһыырга харчыта хомуйуоҕуҥ диэн ис сүрэхтэриттэн эппит ыҥырыы тыллара бүттүүн норуоту долгуппута чахчы.
Күндү сахабыт дьоно! Хаһыат ыарахан кэмигэр төрөөбүт норуоппут үйэлээх үгэстэрин, төрүт култууратын, тылбытын сайыннарыыга үлэбитин сыаналаан, өйөөбүккүт, көмөлөспүккүт иһин сүһүөхтээх бэйэбит сүгүрүйэн туран махтанабыт!
“Кыым” эрэдээксийэтэ.
