Олунньу 18-с түүнүгэр Дьокуускай суһал сулууспалара улахан көрдөөһүн тэрийдилэр. Тоҕус саастаах уол 14:00 чаас саҕана үөрэнэр лиссиэйиттэн тахсан барбыт уонна дьиэтигэр тиийбэтэх. Кини бүгүн бэйэтэ көһүннэ. Дьэ, туох буолбут эбитий?
Оттон бэҕэһээ төрөппүттэрэ, көрдүү, кэтэһэ сатаан бараннар ыксаан, 01:18 чааска полицияҕа эрийбиттэр. СӨ Быыһыыр сулууспатын, полиция уонна муниципальнай аварийнай-быыһыыр сулууспа үлэһиттэрэ оҕону тута көрдөөн барбыттара. Кинилэргэ уол бииргэ үөрэнэр оҕолорун төрөппүттэрэ уонна волонтердар кыттыспыттара.
«Оҕону түүнү быһа көрдөөтүбүт. Дьиэ кэргэн олорор сириттэн саҕалаан Сайсарга диэри хас биирдии дьиэ киирэр аанын, гараастары, бары муннуктары көрдүбүт. Хата, дьолго, сарсыарда уол оскуолаҕа бэйэтэ тиийэн кэлбит, туруга үчүгэй», — диэн ыстаарсай быыһааччы Сергей Рожин кэпсээтэ.
СИА иһитиннэрбитинэн, уолчаан хойукка диэри оонньоон баран төрөппүттэриттэн куттанан атын дьиэ подъеһыгар хонорго быһаарыммыт. Онон, ийэни уонна оҕону кытта полицияҕа сэрэтэр кэпсэтии ыытылынна. Оттон сорох ситимнэргэ уол мунан атын дьиэ подъеһыгар киирэн утуйбут диэн суруйдулар. Оннук буолуон сатаммат, тоҕо диэтэххэ, кини үөрэнэр оскуолатыттан адьас чугас сылдьыбыт.
Олеся ТИМОФЕЕВА.
