«Полярные авиалинии» хампаанньа бастакытын көтөр эдэр пилоттарын үгэс быһыытынан уруйдаан-айхаллаан көрсөр.
Ол курдук, бүгүн Омскайдааҕы гражданскай авиация колледжын бүтэрэн баран иккис пилотунан үлэҕэ киирбит Артур Аргунов бөртөлүөт хамандыырын быһыытынан бастакытын көтөн кэллэ. Киниэхэ Маҕан - Сэбээн Күөл – Маҕан маршрутунан суһал санитарнай эриэйсэ түбэстэ.
Артур кэлэн баран бииргэ көппүт экипаһыгар махталын биллэрдэ: «Чуолаан, хамандыыр үлэтигэр үөрэппит пилот-инструктордарга Виктор Куликовка уонна Семен Семеновка махтанабын. Бүгүн миэхэ олус долгутуулаах уонна эппиэтинэстээх түгэн буолла», - диэтэ кини.
Эдэр киһи олоҕун авиацияны кытта бортмеханик аймаҕын холобурунан уонна ийэтин сүбэтинэн ситимнээбит эбит. Саҥа сүрэхтэммит хамандыырга бастакы көтүү бэлиэтигэр өйдөбүнньүк бэлэхтэри туттардылар.
Сонун төрдө: «Полярные авиалинии» хампаанньа
