Анал байыаннай дьайыыга сылдьан тыына быстыбыт байыас Вячеслав Слепцов кэриэһигэр төрөөбүт сэлиэнньэтигэр Бөтөҥкөскө оскуола-уһуйаан тутуохтара. Кини манна баһылыгынан талыллыбыт эбит.
Ил Дархан Айсен Николаев Баатаҕайга буолбут сүбэ мунньахха бу эбийиэги өрөспүүбүлүкэ инбэстииссийэлиир тосхолугар киллэрэргэ, үбүн көрөргө уонна Адыаччы нэһилиэгэр түргэнник тутан саҕалыырга дьаһайда. Онуоха, 120 үөрэнээччигэ уонна 75 иитиллээччигэ анаммыт оскуола-уһуйаан бырайыактаах-симиэтэлээх докумуонун улуус дьаһалтата оҥорбут, сир анаабыт.
Вячеслав Слепцов муниципалитет баһылыгынан уоппуска кэмигэр талыллыбыт. Бу Арассыыйаҕа мобилизацияламмыт байыас салайар дуоһунаска талыллыытын бастакы түбэлтэтэ эбит. Кини сырдык тыына ааспыт сыл ахсынньытыгар ДНР Макаровка нэһилиэнньэлээх пуунун аттыгар быстыбыт.
Байыас тыыннааҕар «Бойобуой сомоҕолоһуу иһин» (За укрепление боевого содружества) мэтээлинэн наҕараадаламмыт. Кинини өлбүтүн кэннэ Бүтүн Арассыыйатааҕы «Служение» бириэмийэҕэ номинант быһыытынан киллэрбиттэр. Куоластааһын кулун тутар 1 күнүттэн саҕаланар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
