Кулун тутар 18-20 күннэригэр Дьокуускайга Табаһыттар IV сийиэстэригэр өрөспүүбүлүкэ 20 улууһуттан 250 делегат кэлиэҕэ. Кинилэри таһынан Кытай, Монголия табаһыттара кэлэн кыттыахтара.
Онон сибээстээн бырабыыталыстыба бэрэссэдээтэлин солбуйааччы Сергей Местников мунньаҕар бэлэмнэнии хайдах баран иһэрин көрдүлэр. Сүрүн болҕомтону тэрээһин дьыалабыай өттүгэр, чуолаан Сүрүн мунньаҕы, «XXI үйэ иккис чиэппэригэр хотугу дьиэ табатын иитии» (Северное домашнее оленеводство во второй четверти XXI века) диэн тиэмэлээх төгүрүк остуолу, сэминээрдэри ыытыыга уурдулар. Манна төрүт дьарыгы харыстааһын, ыччаты табаны иитиигэ тардыы курдук уонна о.д.а. тыҥаан турар кыһалҕалары быһаарсыахтара.
Сийиэс чэрчитинэн Василий Михайлович Кладкин аатынан судаарыстыбаннай бириэмийэни туттарыахтара, делегаттар АГАТУ-га кылгас болдьохтоох таһымы үрдэтии куууруһун ааһыахтара, быраастарга көрдөрүөхтэрэ, Дьокуускай кэрэхсэнэр сирдэригэр, култуура тэрээһиннэригэр сылдьыахтара.
Маны таһынан, «Көс олох эйгэтэ» (Мир кочевья) күрэс-быыстапка, оҕолорго «Хотугу таба» уруһуй күрэҕэ, хотугу норуоттар төрүт таҥастарын көрдөрүү, «Бастыҥ таба көлүүрэ» (Лучшая оленья упряжка) көрүү-күрэх, төрүт оҥоһуктар быыстапка-дьаарбаҥкалара, «Көс дьиэ кэргэн» өрөспүүбүлүкэтээҕи күрэс ыытыллыахтара.
Ордук чаҕылхай түгэнинэн Сайсары күөлүгэр Табаһыттар оонньуулара буолуоҕа. Манна 14 улуустан хамаандалар кыттыахтара. Кыайыылаах хамаандаҕа АЛРОСА хампаанньаттан «Урал» баахтабай массыынаны туттарыахтара. Оттон кулун тутар 21 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр сийиэһи үөрүүлээхтик сабар улахан кэнсиэр буолуоҕа.
Сонун төрдө: СӨ Бырабыыталыстыбатын уонна Ил Дарханын пресс-сулууспата
