Дьокуускай куорат Дууматын дьокутааттара аат иҥэрии туһунан уочараттаах мунньахтарыгар Ленин проспегын илиҥҥи өттүн «Өрөспүүбүлүкэ болуоссата» диэн ааттыыр туһунан быһаарыыны ылыннылар. Онуоха, урут этиллибитин курдук, уораҕай арҕааҥҥы өттө Ленин болуоссатынан хаалар.
Санатар буоллахха, ааспыт сылга болуоссаты киин куорат маастар-былаанын иитинэн саҥаттан төрүт сахалыы истиили тутуһан туппуттара. Манна сэргэ быһыылаах холуонналар турбуттара, харысхал ойуулаах билиитэ тэлгэммитэ, алаас курдук төгүрүк, ирбэт тоҥ курдук тирэхтээх үрдүк амфитеатр баар буолбута, муусукалаах фонтан таҥыллыбыта.
Саҥардыллыбыт болуоссат аата уларыйарын туһугар үгүс ытык дьон, уопсастыбанньыктар, учуонайдар, култуура диэйэтэллэрэ этиммиттэрэ. Өрөспүүбүлүкэ болуоссата баар буоларын туһугар 4 тыһ. тахса киһи илии баттаабыта. Онон, Дьокуускай олохтоохторо уонна ыалдьыттара Өрөспүүбүлүкэ күнүн саҥа болуоссакка көрсүөхтэрэ.
Сонун төрдө: Дьокуускай куорат Дуумата
