Аҕыйах хонуктааҕыта Екатеринбург куоракка күнүстэри “ротвейлер” боруодалаах ыт хаһаайыннарыттан куотан иһэн оҕолоох дьахтарга саба түспүт. Ийэ, уолун өрүһүйээри, үрдүгэр сыппыт уонна дэлби ыкка ытыртарбыт. Ол сытан полицияҕа эрийбит.
Кини, төһө да эмсэҕэлээтэр, уолун уоскутар үһү. Сотору кэминэн ыт ытыран бүппүт, ол эрээри кими да чугаһаппакка сиэртибэлэрин харабыллаан олорбут. Кэмниэ-кэнэҕэс, ыты хаһаайыттара кэлэн ылбыттар. Кинилэр маҥнай «биһиги ыппыт буолбатах» диэн мэлдьэһэ сатаабыттар эбит. Ааһан иһэр дьон оҕолоох ийэҕэ суһал көмөнү ыҥырбыттар. Кинилэри балыыһаҕа илдьибиттэр. Дьахтар ытыртарбыт илиитэ тостубута биллибит.
Бу түбэлтэҕэ быраабы араҥаччылыыр уорганнар, борокуратуура уонна силиэстийэлиир кэмитиэт бэрэбиэркэ ыытыахтара. Ити ыттан эрдэ эмсэҕэлээбит өссө икки туоһу көстүбүт. Онон, ыт хаһаайыннарыгар холуобунай дьыала тэриллэр чинчилээх.
Сонун төрдө: КП – Екатеринбург
