Кулун тутар 1-2 күннэригэр номоххо киирбит Н.К. Докторов-Бычырдаан кэриэһигэр ыытыллыбыт хапсаҕай турнирыгар өрөспүүбүлүкэ 17 улууһуттан уонна Тываттан барыта 170-ча бөҕөс сытыы хапсыһыыларга күөн көрүстүлэр. Ол курдук, 75 диэри ыйааһыҥҥа – Тимур Николаев, 75-тэн үөһэ ыйааһыҥҥа – Леонид Попов, бэтэрээннэргэ - Хаҥалас бөҕөһө Степан Гаврильев, уолаттарга – Кэбээйиттэн Марк Куличкин муҥутуур кыайыылаахтарынан ааттаннылар.
Кыайыылаах Тимур Николаев күрэх туһунан санаатын үллэһиннэ:
“Бу күрэхпит сыл көтө-көтө буолар. Былырыын Буучугурас аатыгар анаммыт буоллаҕына, быйыл - Бычырдаан аатыгар. Күрэхтэһии этэҥҥэ ааста. Бэйэм ыйааһыммар уонна абсолютнайга бастаатым. Бычырдаан аатынан турнирга бастакыбын кытынным. Бу күрэхтэһии Петр Алексеев аатыгар Манчаары оонньууларыгар сүүмэрдиир күрэххэ бэлэмнэнии курдук ааста. Бары Манчаарыга бэлэмнэнэр буоланнар, киирсиилэр олус сэргэхтик, сытыытык аастылар. Кэлэн ыалдьыбыт дьоммор-сэргэбэр, күрэх тэрийээччилэригэр улахан махталбын тиэрдэбин”.
Татьяна Жанчикова.
Сонун төрдө: «Үөһээ Бүлүү» хаһыат телеграм-ханаала.
