СӨ Национальнай ойуулуур-дьүһүннүүр түмэлигэр кулун тутар 5 күнүттэн Монголия биллиилээх худуоһунньуктарын «Легенда» диэн быыстапката үлэлиэҕэ. Манна Амгаланбаатарын Сонинбаяр, Норовпэлжээгийн Мунхбат, Батбаатарын Цолмонбаяр, Энхбаярын Ганзориг хартыыналара киирдилэр.
Быыстапканы аҕалбыт худуоһунньуктар Дьокуускайга «Харысхал» пуонда базатыгар уонна Оҕо ускуустубатын оскуолатыгар маастар-кылаас ыыттылар. Маны таһынан СӨ тас сибээскэ уонна норуоттар дьыалаларыгар миниистирэ Гаврил Кириллини кытта көрүстүлэр. Кинилэр Монголияҕа ыытыллар ыһыах кэмигэр саха уонна монгол бырааһынньыктарыгар аналлаах быыстапка тэрийэн ыытарга быһаарыстылар. Маны сэргэ Саха сирин худуоһунньуктарын сойууһун уонна Намнааҕы педагогическай колледжы кытта үлэлэһии салҕанар.
Монголия ускуустубата көс култуура, буддизм, шаманизм, норуот уус-уран айымньытын, төрүт дьарыгын дьайыытынан үөскээбитин бэлиэтиибит. «Легенда» быыстапка көс норуот санаатын күүһүн, кэрэтин уонна дьолун көрдөрөр «Монгол Зураг» диэн хайысха айымньыларын билиһиннэрэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
