Госдумаҕа кыылларга эппиэтинэстээх сыһыан туһунан федеральнай сокуону саҥаттан көрүөхтэрэ. Ол курдук, өссө үчүгэйдик чопчулаан, эрэгийиэн сокуоннай аакталарын толорууну тохтотор суут быһаарыыларыттан көмүскүөхтэрэ.
Дьокутаат Александр Кошуков этэринэн, Госдумаҕа Ил Түмэн ыттарга сыһыаннаах сокуонун кэмниэ-кэнэҕэс өйөөбүттэр. Маныаха соторутааҕыта ыттар оҕолору сиэбит дьулаан түбэлтэлэрэ төрүөт буоллулар. Онон, спикер Вячеслав Володин эрэгийиэннэр сөптөөх быһаарыныылары ылыналларын туһугар Дьиэ кэргэн көмүскэлин, ийэ-аҕа уонна оҕо саас боппуруостарын кэмитиэтигэр сокуон бырайыагын түргэнник киллэрэргэ сорудах биэрдэ.
Санатар буоллахха, 2023 сылга Госдума федеральнай сокуону толорууга локальнай миэрэлэри ылынар боломуочуйалары эрэгийиэннэргэ биэрбитэ. Бу быраабы дойду үрдүнэн 20 эрэ эрэгийиэн туһаммыта. Саха сирэ бу испииһэккэ бастакы буолбута. Ол курдук, ааспыт сылга Ил Түмэн дьокутааттара бэйдиэ сылдьар ыттары дьаһайыы бэрээдэгин уонна онно туһуламмыт тэрээһиннэр тустарынан сокуон ылыммыттара.
Ол эрээри бу сокуону кыыллары көмүскүүр уопсастыбанньыктар утарбыттара. Кинилэр ирдэһиилэринэн, эрэгийиэн сокуона федеральнай сокуоҥҥа сөп түбэспэтин иһин, сууттар эвтаназияҕа сыһыаннаах өттүн көтүрэ турбуттара. Онон, кэмитиэт бэрэссэдээтэлэ Нина Останина бу боппуруоһу букатыннаахтык быһаарыыны мэктиэлээтэ.
Сонун төрдө: СИА
Эрэдээксийэттэн: Билигин ытырыык уонна хаһаайына суох ыттары эвтаназиялааһын ханна көҥүллэнэрий?
- Мурманскай уобалаһыгар;
- Астрахань уобалаһыгар;
- Оренбург уобалаһыгар;
- Самара уобалаһыгар;
- Ставрополь кыраайыгар;
- Удмуртия өрөспүүбүлүкэтигэр;
- Ханты-Мансийскай уокуругар;
- Алтай кыраайыгар;
- Тыва өрөспүүбүлүкэтигэр;
- Забайкальскай кыраайга;
- Кемеров уобалаһыгар;
- Чукотка уокуругар.
