“Аврора” мэдиссиинэ килииньикэтин “Көхтөөх уһун үйэлэнии” киинин кэлэктиибин уонна тус бэйэм ааппыттан үөрэн-көтөн, сүргэлиин көтөҕүллэн туран сааскы үтүөкэн бырааһынньыгынан – Кулун тутар 8 күнүнэн – итиитик уонна истиҥник эҕэрдэлиибин!
Эһиги алаһа дьиэ араҥаччыта, дьиэ кэргэн тулхадыйбат, эрэллээх тулааһына буолаҕыт. Кииммит тусаһатыгар эһигини – сахалыы куттаах-сүрдээх дьиэ кэргэн бастыҥ бэрэстэбиитэллэрин, дьикти уһун үйэлээхтэри, уопсастыбаннай көхтөөх, төрөөбүт-үөскээбит Сахабыт сирэ чэчирии сайдарын туһугар олохторун анаабыт дьахталлары – күннэтэ көрөбүт. Ол курдук, бу кылгас кэм иһигэр биһиги Кииммит иһинэн номнуо 1700-чэ киһи киирэн ааста. Эһиги уопуккут, дириҥ, баай билиигит уонна аламаҕай сыһыаҥҥыт – барыбытыгар туохха да тэҥнэммэт күндү бэлэх.
Эһиги – кынаттыыр күүс, сырдык, сылаас сүүрээн буолаҕыт. Олоххо үөрэ-көтө, көхтөөхтүк сыһыаннаһаргыт биһигини эмиэ көҕүлүүр, иннибит хоту салгыы айанныырбытыгар күүс-көмө буолар. Эһиги уостубат эрчимҥитин, чугас дьоҥҥутугар, олоҕу көрүүгүтүгэр уонна төрөөбүт дойдугутугар бэриниилээх сыһыаҥҥытын сөҕөбүт.
Бу үтүөкэн күҥҥэ бөҕө доруобуйаны, муҥура суох дьолу, сааскы настарыанньаны уонна уһун үйэни баҕарабыт! Хас биирдии саҥа күҥҥүт тапталынан, кыһамньылаах сыһыанынан уонна үөрүүлээх түгэннэринэн туоллун. Чугас дьоҥҥут тапталлара сүрэххитин угуттаатын!
Бырааһынньыгынан, күндү дьоммут!
