Өрөспүүбүлүкэтээҕи «МУУС УСТАР» ыччат бэстибээлин хедлайнердарынан икки төгүллээх олимпийскай чөмпүйүөн, Европа икки төгүллээх чөмпүйүөнэ, Арассыыйа успуордун чулуута Олег Саитов, уус-уран гимнастка Екатерина Веденеева, Арассыыйа байыаннай кэрэспэдьиэннэрэ: Арассыыйа Дьоруойа Евгений Поддубный, Семен Пегов (Wargonzo), пранкердар Владимир Краснов уонна Алексей Столяров (Вован и Лексус). Ол туһунан кулун тутар 11 күнүнээҕи пресс-кэмпириэнсийэҕэ Саха сирин Конгресс-киинин салайааччыта Максим Сыромятников биллэрдэ.
Бэстибээл дьыалабыай уонна пуорумнаах тэрээһиннэригэр кыттарга Ыччат дьыалатыгар федеральнай ааҕыныстыба (Росмолодёжь) салайааччыта Григорий Гуров, «Движение Первых» хамсааһын бэрэссэдээтэлэ, Арассыыйа Дьоруойа Артур Орлов сөбүлэҥнэрин биэрдилэр. Өссө «Ыраас Арктика» федеральнай бырайыак тэрээһиннэрин арыйа салайааччыта, «Күөх патруль» хамсааһын тумус киһитэ Андрей Нагибин кэлиэҕэ.
Маны таһынан «Накануне Победы. 80 лет спустя» бырайыак иитинэн кулун тутар 21 күнүгэр Үлэ кыбаарталыгар «Говорим. Смотрим. Читаем. Думаем» пуорум ыытыллыаҕа. Сүрүн мунньаҕар модератордарынан Социальнай чинчийиилэргэ эспиэрдиир институт эрэгийиэннэри кытта үлэлиир департаменын дириэктэрэ, РФ Уопсастыбаннай палататын чилиэнэ Дарья Кислицына уонна мусукаан, Леонида Лундстрем айар мастарыскыайын дириэктэрэ, РФ Уопсастыбаннай палататын култуураҕа уонна духуобунай нэһилиэстибэни харыстааһыҥҥа хамыыһыйатын бэрэссэдээтэлэ Петр Лундстрем буолуохтара.
Манна РФ Бэрэсидьиэнин Уһук Илиҥҥи уокурукка боломуочуйалаах бэрэстэбиитэлин солбуйааччыта Григорий Куранов, РФ култуура миниистирин солбуйааччыта Сергей Першин, РФ Бэрэсидьиэнин Устуоруйа өйдөбүлүн национальнай киинин салайааччыта, РФ Уопсастыбаннай палататын үрдүк үөрэҕи уонна билими сайыннарыыга хамыыһыйатын чилиэнэ, устуоруйа билимин хандьыдаата Елена Малышева, биллиилээх суруйааччы, РФ Уопсастыбаннай палататын култуураҕа уонна духуобунай нэһилиэстибэни харыстааһыҥҥа хамыыһыйатын чилиэнэ Сергей Лукьяненко, документальнай киинэ режиссера, фронт киинэтин хроникатын оператора Максим Фадеев уонна да атыттар кыттыахтара.
Эрэдээксийэттэн: ХЕДЛАЙНЕР – (англ. headliner) элбэх киһилээх тэрээһин сүрүн ыҥырыылаах ыалдьыта. Дойдуга бэриниилээх буолууну үөскэтэр тэрээһиҥҥэ тоҕо англия тылын тутталлара өйдөммөт. Ама, ити тылы солбуйар нуучча тыла суох үһү дуо?
