Кулун тутар 15 күнүгэр, ытык Сайсары күөлүгэр «Аҕа күрэҕэ – 2025» – аҕалар уонна уолаттар күрэхтэһиилэрэ буолан ааста. Тэрээһин Арассыыйаҕа Аҕа дойду көмүскэлин сылыгар уонна Саха Өрөспүүбүлүкэтигэр төрөөбүт дойду көмүскэлин сылыгар аналлаах.
Сүрүн тэрийээччилэр – Дьокуускай уокуруктааҕы дьаһалтатын уопсастыбаннай сибээскэ уонна ыччат бэлиитикэтигэр, физическэй култуураҕа уонна успуорка салалталара, киин куорат “Аҕаларын сүбэтэ”, “Северное сияние” ХЭТ. Кинилэр күрэхтэһии үрдүк таһымнаахтык ааһарын туһугар кичэйэн үлэлээбиттэр.
Киин куорат араас уокуругуттан уонна куорат ыксатынааҕы бөһүөлэктэртэн тоҕус хамаанда кытынна. Аҕалар уонна уолаттар үгэс буолбут түһүмэхтэргэ: бэрэбинэни суорууга, эрбэтиигэ, маһы хайытыыга, уот оттон чэй оргутууга, остуолбаҕа ыттыыга, сыал ытыылаах булчут биатлонугар кыахтарын көрдөрдүлэр.
Тэрээһин бэрт көхтөөхтүк ааста. Кыттааччылары дьиэ кэргэттэрэ, доҕотторо өйүү кэлбиттэр. Күөл аттыгар олорор дьон күрэх тыаһын-ууһун, муусукатын истэн, туох буола турарын сэргээн кэлбиттэр. “Иһитиннэрии олох аҕыйах, алҕаска билэн кэллим” диэн билиннилэр.
Тыҥааһыннаах киирсии түмүгэр, күрэхтэһии кыайыылааҕынан киин уокуруктан Лебедевтэр дьиэ кэргэттэрэ буоллулар. Иккис уонна үһүс миэстэлэри Пригороднай нэһилиэгиттэн Анисимовтар уонна Хатастан Тихоновтар дьиэ кэргэттэрэ ыллылар. Лебедевтар уонна Анисимовтар Хаҥалас улууһуттан төрүттээхтэр эбит. Онон Хаҥаластарга эҕэрдэ!
Кыайыылаах хамаандалар Өрөспүүбүлэкэтээҕи «Аҕа күрэҕэ – 2025» күрэххэ Дьокуускай куорат чиэһин көмүскүөхтэрэ.
Олеся Тимофеева.
