Ааспыт сылга Хандыга бөһүөлэгэр өрүс кытылын тупсаран оҥоруу Бүтүн Арассыыйатааҕы Уһук Илиҥҥи уокурук куораттарыгар табыгастаах эйгэни тэрийиигэ бастыҥ бырайыактар күрэстэригэр кыайбыта. Онон, «Алаас» тэрилтэ оҥорбут дизайынынан үлэни быйыл саҕалыахтара.
Саха сирин сүрүн архитектора Любовь Папок, «LETO» сатабыл киин салайааччыта Ирина Маркина, итиэннэ урбаан уонна туризм миниистирин солбуйааччыта Мария Карпова Томпо улууһугар тиийэ сылдьан бырайыагы кытта билистилэр.
Өрүс кытыла бөһүөлэккэ соҕотох уопсастыбаннай уораҕай буолар. Онон кытылы туспаран оҥоруу олохтоохторго улахан суолталаах. «Алаас» тэрилтэ салайааччыта Геннадий Попов этэринэн, бырайыагын оҥорууга, бастатан туран, олохтоохтор санааларын учуоттаабыттар.
Ол курдук, кытыл үс зонаҕа арахсыа. Бастакыга тэрээһиннэри ыытарга аналлаах, олорон көрөр миэстэлэрдээх уонна подиумнаах, Алдан өрүс көстүүтэ киэргэтиилээх, көҕөрдүүлээх былаһаакка киириэ. Иккискэ – көхтөөхтүк сынньанар сир: павильон, кафе, хачыаллар, ырааҕы көрөр, оонньуур, скейтыыр, успуордунан дьарыктанар былаһаакка, трибуна; үһүскэ – хойуу оттоох-мастаах аллеялаах чуумпу сир баар буолуохтара.
Бырайыакка массыына суолугар туттуллар сүрүн матырыйаалы – гальканы уонна урукку олоҕу кэрэһэлиир дьэбин буолбут тимири туһаныахтара.
Сонун төрдө: «LETO» сатабыл киинэ
