Саха сирин табаһыттарын IV-с сийиэһигэр сүүрбэ улуустан 240 дэлэгээт кэлэн кыттыаҕа. Ытык ыалдьыттарынан «Аан дойду табаһыттара» ассоциация бэрэсидьиэнэ Сергей Харючи, «Арассыыйа табаһыттара» ассоциация бэрэссэдээтэлэ Михаил Яр, Кытай, Монголия уонна РФ эрэгийиэннэрин бэрэстэбиитэллэрэ буолуохтара. Ол туһунан Сийиэһи тэрийээччилэр пресс-кэмпириэнсийэҕэ кэпсээтилэр.
СӨ Тыа хаһаайыстыбатын уонна ас-үөл бэлиитикэтин миниистирин солбуйааччы Прокопий Николаев иһитиннэрбитинэн, Хотугу аҕыйах ахсааннаах төрүт омуктар ассамблеяларын сүбэ мунньаҕын, «Хотугу дьиэ табатын XXI-с үйэ иккис чиэппэригэр иитии» төгүрүк остуол уонна Сийиэс сүрүн мунньаҕын түмүктэринэн өрөспүүбүлүкэҕэ табаны иитиини харыстыыр уонна сайыннарар үлэни салгыы ыытарга олук буолар түмүк докумуон ылыныахтара.
Тэрээһин сүрүн түгэнинэн кулун турар 20 күнүгэр Сайсары күөлгэ ыытыллыа Табаһыттар оонньуулара буолуоҕа. Тыҥааһыннаах күрэхтэһиилэргэ барыта 18 хамаанда илин былдьаһыаҕа. Муҥутуур кыайыылаах хамаанда АЛРОСА хамаандаттан «Урал-вахтовка» грузовигы ылыаҕа. Иккис миэстэлээх хамаандаҕа «Саханефтегазсбыт» тэрилтэ генеральнай дириэктэрэ, бэйэтэ табаһыттар дьиэ кэргэннэригэр улааппыт Виктор Лебедев тус хармааныттан УАЗ-фургону туттарыаҕа. Үһүс миэстэни ылбыт хамаанда Тыа хаһаайыстыбатын министиэристибэтиттэн «Буран» көлөнү тутуоҕа.
Маны таһынан, пресс-кэмпириэнсийэҕэ ыытыллар тэрээһиннэргэ төһө сайаапка киирбитин кэпсээтилэр. Ол курдук, «Көс дьиэ кэргэн» күрэскэ Анаабыр, Булун, Кэбээйи, Муома, Аллараа Халыма, Өлөөн, Томпо уонна Эбээн-Бытантай улуустарыттан 8 дьиэ кэргэн сайаапка ыыппыт. «Көс олох эйгэтэ» хаартыскалар күрэс-быыстапкаларыгар 21 ааптартан 70 үлэ киирбит. АБДь кыттыылааҕа Николай Ефимов кэриэһигэр «Туймаада» ансаамбыл кэнсиэртиир саалатыгар ыытыллыахтаах «Сүрэхтэн тахсар ырыалар» гитаранан ырыа куонкуруһугар 14 сайаапка киирбит. Хотугу аҕыйах ахсааннаах төрүт омуктар истииллэммит уонна табаһыттар төрүт таҥастарын көрдөрүүгэ 130 тахса киһи тахсыа. Сийиэс үлэтэ тыйаатырдар уонна 30 айар кэлэктиип кыттыылаах үс чаастаах улахан кэнсиэринэн түмүктэниэ.
Сонун төрдө: СӨ Бырабыыталыстыбатын уонна Ил Дарханын пресс-киинэ
