СӨ Ил Дархана Айсен Николаев уонна Уһук Илиҥҥи байыаннай уокурук материальнай-техническэй хааччыллыытын штабын начальнига, генерал-майор Евгений Леонтенков кулун тутар 18 күнүгэр младшай лейтенант Петр Киприянов дьонугар өлбүтүн кэннэ бэриллибит наҕарааданы - РФ Дьоруойун «Кыһыл көмүс сулус» мэтээлин туттардылар. Кини Саха сириттэн уон биирис киһинэн Арассыыйа Дьоруойа буолла.
Петр Александрович Киприянов 1985 сыл алтынньы 6 күнүгэр САССР Орджоникидзевскай оройуонун Мохсоҕоллоох бөһүөлэгэр Ольга Семеновна уонна Александр Петрович Киприяновтар дьиэ кэргэннэригэр төрөөбүтэ, оскуоланы онно бүтэрбитэ. Дьоруой сулуһун – офицер кэргэнигэр Зинаида Михайловна Киприяноваҕа, РФ Бэрэсидьиэнэ Владимир Путин олунньу 21 күнүнээҕи Ыйааҕынан Дьоруой аатын иҥэрэр туһунан грамотаны – офицер аҕатыгар туттардылар.
Айсен Сергеевич Петр Александрович мотострелковай взвод хамандыыра буолан туран өстөөх уотун бастакынан ылынарын, байыастарын араас уустук түгэнтэн элбэхтик таһаарбытын, кыайыы туһугар бэйэтин олоҕун толук уурарын кэрэйбэтин, ханна даҕаны ытыктанар хамандыыр буоларын бэлиэтээтэ. Генерал-майор Евгений Леонтенков байыас аҕатыгар Александр Петровичка маннык хорсун байыаһы уонна дойдутугар бэриниилээх киһини иитэн таһаарбытын иһин ис сүрэҕиттэн махтанна.
Ол курдук, кини мындыр салайыытынан взвод өстөөх позицияларын улахан сүтүгэ суох ыларын, түргэн уонна сөптөөх быһаарыылары оҥорорун, атын этэрээттэргэ, биригээдэлэргэ эмиэ көмөлөһөрүн, тус бэйэтэ элбэх өстөөҕү суулларбытын кэпсээтилэр. Хомойуох иһин, 2024 сыл балаҕан ыйын 28 күнүгэр Петр Александрович Константиновка диэн нэһилиэнньэлээх пуун аттыгар, кимэн киирэр дьайыыларга ыараханнык бааһыран, тыына быстыбыт.
Наҕарааданы туттарыыга Петр бииргэ сулууспалаабыт доҕотторун аатыттан рота хамандыыра, старшай лейтенант Владимир Кравцов уонна СӨ норуодунай дьокутаата Алиш Мамедов тыл эттилэр. Дьокутаат Мохсоҕоллоох саҥа оскуолатыгар Арассыыйа Дьоруойа Петр Александрович Киприянов аатын иҥэрэргэ этии киллэрдэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, СИА
