Арктика күнэ бэлиэтэнэр кулун тутар 19 күнүгэр Муома улууһун Хонуу сэлиэнньэтигэр саҥа Атыы-логистика киинэ (ТЛЦ) аһылынна. Эбийиэги үөрүүлээхтик арыйыыга Ил Дархан Айсен Николаев кытынна. Кини улуус олохтоохторун кэтэһиилээх түгэн үүммүтүнэн эҕэрдэлээтэ уонна РФ Уһук Илини кытары Арктиканы сайыннарыы министиэристибэтигэр тутууну үбүлээбиттэрин иһин махтанна.
Бу Саха сиригэр онус ТЛЦ буолар. Сүрүн соруга – уустук суоллаах Муома улууһун сыл устата тохтоло суох сүрүн аһынан-үөлүнэн хааччыйыы, түргэнник эргэрэр аһылыгы уһун кэмҥэ сөптөөх усулуобуйаҕа харайыы. Маны сэргэ, Ил Дархан дьаһалынан Атыы-логистика киинигэр олохтоох оҥорон таһаарааччылар бородууксуйаларын атыылаһан ылыахтаахтар. Ол курдук, Дьокуускайга кэнсиэрбэ сыаҕар ыытан астататарга нэһилиэнньэттэн сир аһын, балыгы уонна эти тутуохтаахтар. Өссө бу ТЛЦ нөҥүө дьиэ тутар уонна өрөмүөннүүр матырыйаал атыылаһыан баҕалаахтар элбэхтэр эбит. Маны таһынан, саҥа эбийиэккэ элбэх киһи үлэнэн хааччыллыбыт, үлэһиттэр усулуобуйалара тупсубут.
ТЛЦ уопсай иэнэ – 530 кв.м. Манна атыылыыр саала, оҕуруот аһын харайар сир, тымнытар хаамыралар уонна сылаас ыскылаат киирэллэр. Өссө 188 кв.м. иэннээх тымныы ыскылаат тутуллубута. Оҕуруот аһын аныгы тэрил көмөтүнэн өрүү биир сөптөөх температураҕа уонна сииктээх салгыҥҥа туталлар. Быйыл маннык кииннэр Эбээн-Бытантай, Аллайыаха уонна Өлөөн улуустарыгар тутуллуохтара. Оччоҕо Саха сирин Арктикатын бары 13 улууһа тыын суолталаах табаарынан хааччыллыылаах буолуохтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
