Бэҕэһээ, кулун тутар 19 күнүгэр, Алдан куоракка эрчиллиигэ баран иһэр 10 саастаах уолчааны ыттар тырыта тыыттылар. Дьолго, чугас сылдьар миинньиктээх дьахтар кыттыһан, оҕо барахсан тыыннаах хаалла.
ТайгаПост.ру саайт эмсэҕэлээбит оҕо ийэтин кытта кэпсэтэ сырытта. Кини кэпсээнинэн, күнүс 2 чаас кэннэ уолчаан кыра суолунан баран истэҕинэ быраҕыллыбыт дьиэттэн икки улахан ыт тахсан эккирэппиттэр уонна саба түспүттэр. Ол кэмҕэ икки кыра ыт көрөн турбуттар. Оҕо куотан томторго сүүрэн тахсыбытын аллара соһон түһэрбиттэр. Сүрүннээн төбөтүн уонна өттүгүн ытырбыттар, моойун хайа тардыбыттар. Оҕо дьиэтигэр кэлэригэр төбө сыгынньах уонна доҕолоҥнуур, кутталыттан уонна ыарыыттан ытаабыт эбит. Дьарыктанар оҕо буолан, ыттары суумкатынан охсуолаан, сытан эрэ атаҕынан тэбиэлээн син утарыласпыт. Сэниэтэ эстэн эрдэҕинэ, миинньиктээх дьахтар кэлбит.
Оҕону хайа дьахтар быыһаабыта биллэ илик. Уол ийэтэ кинини булан махтанар санаалаах. Күүһү барытын ытырыык ыттары көрдүүргэ ыыталларын туһунан куорат баһылыга Александр Бугай иһитиннэрбит. Алдан борокуратуурата бэрэбиэркэ ыытар.
Сонун төрдө, хаартыска: https://taigapost.ru
