СӨ Бырабыыталыстыбата уонна «Тандер» АУо Саха сиригэр «Магнит» маҕаһыыннары арыйар туһунан сөбүлэһии түһэристилэр. Онон, эһиил бастакы маҕаһыыннар аһыллыахтара.
Бырабыыталыстыба бэрэссэдээтэлэ Кирилл Бычков этэринэн, дойду бөдөҥ ритейлерин кытта үлэлэһии элбэх үтүө өрүттээх буолуоҕа. Ол курдук, олохтоохтор талар табаардарын көрүҥэ элбиэҕэ уонна саҥа үлэ миэстэлэрэ тахсыахтара. Маны сэргэ, хампаанньа нэһилиэнньэ кыаммат-түгэммэт араҥатыгар анаан аһымал хайысхалары киллэриэхтээх.
«Тандер» хампаанньа бэрэстэбиитэллэрэ олорор дьиэлэри тыын суолталаах аһынан-үөлүнэн, табаарынан хааччыйар уонна «Магнит Косметик» диэн чопчу хайысхалаах маҕаһыыннары арыйар санаалахтарын эттилэр. Кинилэр манна хайыы үйэ бастакы франчайзи партнеру булбуттарын биллэрдилэр.
