Анал байыаннай дьайыы кыттыылааҕа, Эр санаа уордьанын кавалера Николай Потапов бэйэтэ тэрийбит CRYOLITE GAMES геймдев-устуудьуйатыгар саҥа Cake Up оонньууну оҥорон таһаараары сылдьар.
«Бу персональнай көмпүүтэргэ оонньонор дьиэ кэргэҥҥэ аналлаах казуальнай аркада. Маны джойстигынан оонньуохха сөп. Релиз муус устарга STEAM көмпүүтэр оонньууларын платформатыгар тахсыаҕа», – диэн ааптар иһитиннэрдэ.
2022 сыл балаҕан ыйыгар анал байыаннай дьайыыларга хомуур саҕаламмытыгар Николай РФ ВМФ Чуумпу акыйааннааҕы флотун муора пехотатын кэккэтигэр байыаннай бырааһынан сулууспалыы барбыта. Биир кимэн киирии кэмигэр кини ыараханнык бааһыран Дьокуускайга төннүбүтэ. Николай устуоруйатыга олоҕуран «Алдан» диэн уус-уран киинэ уһуллубута.
АБДь бэтэрээнэ эрдэ бырамыысылыннаска туттуллар VEDROID роботы оҥорооччу быһыытынан биллибитэ. Кини роботы манна оҥорон баран Казахстаҥҥа атыылыыр этэ. Өссө Николай ExpoSkills программирование оскуолатын тэрийбитэ. Билигин Саха сирин уонна ДНР оҕолорун саайт уонна көмпүүтэр оонньуутун оҥорорго үөрэтэр.
«Муус устар 2 күнүгэр Дьокуускайга «СБЕР 21» оскуолаҕа геймдев-устуудьуйалар консорциумнарын тэрийэр санааттан стартап, инди-разработчиктар уонна геймдев-устуудьуйалар көрсүһүүлэрин ыытыам. Манна ИТ-индустрия бэрэстэбиитэллэрэ көмпүүтэр оонньуутун оҥорооччуларга бырайыактарын көрдөрүөхтэрэ. STEAM платформа нөҥүө оонньууларбытын аан дойду ырыынагар хайдах таһаарар туһунан кэпсэтиэхпит», – диэн Николай Потапов кэпсээтэ.
Тэрээһиҥҥэ сайаапка ыытар халыып: https://forms.yandex.ru/u/67e129809029021a8b579026/
Сонун төрдө: СӨ Бырабыыталыстыбатын уонна Ил Дарханын пресс-сулууспата
