Анал байыаннай дьайыы кыттыылаахтарын уонна күүһү туһанар структура үлэһиттэрин оҕолоро оскуолаҕа уочарата суох ылаллар. Сүрүн ирдэбилинэн олорор сиринэн прописка уонна онно сыстар оскуола баара буолар. Ол туһунан СӨ үөрэх уонна билими миниистирэ Нюргуна Соколова иһитиннэрдэ.
Оҕолору маҥнайгы кылааска сурутуу дойду үрдүнэн муус устар 1 күнүгэр саҕаланна. Сурутуу судаарыстыбаннай өҥө порталын нөҥүө ыытыллар. Онуоха, төрөппүттэр оскуолаҕа тиийэн кумааҕыга сайабылыанньа суруйар эмиэ бырааптаахтар. Оҕолору ылыы бастакы түһүмэҕэ бэс ыйын 30 күнүгэр диэри түмүктэниэҕэ. Онтон от ыйын 6 күнүттэн балаҕан ыйын 5 күнүгэр диэри баҕалаахтары ордубут миэстэлэргэ ылыахтара.
«Өрөспүүбүлүкэ үрдүнэн оҕолору маҥнайгы кылааска 570 оскуола ылыаҕа. Барыллаан 15,5 тыһыынча оҕо киириэхтээх. Анал байыаннай дьайыы кыттыылаахтарын оҕолорун ааҕыы мэлдьи барар. Ол курдук, Дьокуускай оскуолаларыгар 300 тахса, өрөспүүбүлүкэ үрдүнэн 480 тахса оҕо баар», - диэн миниистир чопчулаата.
Сонун төрдө: CӨ Бырабыыталыстыбатын уонна Ил Дарханын пресс-сулууспата
