Саҥа 2025 сыл саҕана Саха сирин эдэркээн олохтооҕо Ярослав Колесов электропоезд массыньыыһа буолуон баҕарарын «Баҕа санаа харыйатын» саарыгар суруйан ыйаабыт.
Бу оонньуур РФ Бырабыыталыстыбатын бэрэссэдээтэлин солбуйааччы, Уһук Илиҥҥи уокурукка Бэрэсидьиэн боломуочуйалаах бэрэстэбиитэлэ Юрий Труневка түбэспит. Онон, кулун тутар бүтэһик бээтинсэтигэр бэлиэтэнэр Массыньыыс күнүгэр уолчаан ыра санаата туолла. Ярослав Москубаҕа тиийэн тимир суол дьиҥнээх үлэһитин курдук сананна. Кинини Арассыыйаҕа биир бөдөҥ Белорусскай баксаал электродепотыгар сырытыннаран, поезтары хайдах ыыталларын, хайдах харайалларын көрдөрдүлэр уонна массыньыыс миэстэтигэр олортулар.
Ити курдук Ярослав сааскы сынньалаҥа умнуллубаттык ааста. Уолчаан, тимир суолу сэргиирин таһынан, искириипкэнэн уонна ииһинэн дьарыктанар эбит.
Сонун төрдө: СӨ Бырабыыталыстыбатын уонна Ил Дарханын пресс-сулууспата
