РФ Бэрэсидьиэнэ Владимир Путин «Дьокуускай куорат төрүттэммитэ 400 сылын бэлиэтээһин туһунан» Ыйаахха илии баттаата. Докумуону Кириэмил саайтыгар таһаардылар. Үөрүүлээх күнү 2032 сылга бэлиэтиэхпит.
Дойду баһылыга судаарыстыбаннай былаас уонна олохтоох салайыныы уорганнарын бу бэлиэ күҥҥэ бэлэмнэниигэ уонна ыытыыга кытталларыгар ыҥырда. Ил Дархан Айсен Николаев тус ханаалыгар Дьокуускай онуоха диэри ирбэт тоҥ бастыҥ куората буолуохтааҕын тоһоҕолоото уонна Владимир Путиҥҥа өйөбүлүн иһин махтанна.
Санатар буоллахха, РФ Бэрэсидьиэнин сорудаҕынан Дьокуускай куорат маастар-былаана бигэргэммитэ. Бу докумуон иитинэн өрөспүүбүлүкэ сүрүн болуоссата, Роман Дмитриев аатынан кытыл, Сайсары күөл кытыла туоналара тупсаҕайдык тутуллубуттара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
