Муус устар 4 күнүгэр биллиилээх судаарыстыбаннай, бэлитиичэскэй диэйэтэл, Саха сирин 1965 сылтан 1982 сылга диэри салайбыт, Аҕа дойду Улуу сэриитин кыттыылааҕа, бүттүүн киэн туттар биир чулуу киһибит Гавриил Иосифович Чиряев төрөөбүтэ 100 сылын туолбута. Айсен Сергеевич бэлиэтээбитин курдук, Гавриил Иосифович үтүө аата дойду историятыгар кыһыл көмүс буукубанан тиһиллибитэ. Кини 17 сыл устата өрөспүүбүлүкэни салайбыта уонна салгыы сайдарыгар бигэ тирэҕи хаалларбыта.
«Гавриил Чиряев салалтатынан бырамыысылыннас, энэргиэтикэ, тырааныспар далааһыннаахтык сайдыбыттара, саҥа куораттар тутуллубуттара, доруобуйа харыстабыла уонна үөрэх салаалара бөҕөргөөбүттэрэ, тыа хаһаайыстыбата сайдыбыта, оскуолалар, балыыһалар, оҥорон таһаарар тэрилтэлэр тутуллубуттара. Кини бэйэтигэр сүҥкэн эппиэтинэһи сүгэртэн чаҕыйбакка сөптөөх быһаарыныылары ылынара. Саха чулуу уола Гавриил Иосифович Чиряев туһунан сырдык өйдөбүл билиҥҥи уонна кэлэр көлүөнэлэргэ мэлдьи ахтылла туруоҕа», - диэн Айсен Сергеевич эттэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
