Ыам ыйыттан «Аэрофлот» хампаанньа Москубаттан көтөр «хаптаҕай» (плоский) тарыыптарын Уһук Илин Благовещенскай, Дьокуускай, Анадырь, Улан-Удэ куораттарыгар эбии киллэрэр буолла. Хампаанньа генеральнай дириэктэрэ Сергей Александровскай этиитин Бэрэсидьиэн Владимир Путин өйөөтө.
«Хаптаҕай» тарыып диэн экэниэм кылаастаах сыаната уларыйбат билиэттэри ааттыыллар. Атын хайысхаларга билиэт сыаната көтөр күн чугаһаатаҕына эбэтэр билиэт аҕыйаатаҕына биллэрдик үрдүүр буоллаҕына, манна уларыйбат. Онон, саҥа чэпчэки сыаналаах тарыыбынан Москубаҕа көтөр билиэти муус устар 8 күнүттэн атыылаһыахха уонна ыам ыйын 15 күнүттэн көтүөххэ сөп.
«Аэрофлот» хаптаҕай эбэтэр уларыйбат тарыыптары Уһук Илиҥҥэ 2015 сылтан үлэлэтэр. Ол эрээри Москубаттан көтөргө манна Владивосток, Хабаровскай, Южно-Сахалинскай, Петропавловскай-Камчатскай уонна Магадаан эрэ хапсаллара. Манна Дьокуускай эбиллэн биэрбититтэн үөрүөҕүҥ.
Хаартыска: http://www.kremlin.ru
